ထိုင်းက ရောဂါကူးစက်ခံရတဲ့ တစ်လသား ကလေးငယ် ကျန်းမာရေး ပြန်ကောင်းလာ
ဧပြီ - ၂၃ ၊ ၂၀၂၀
ထိုင်းနိုင်ငံက တစ်လသားအရွယ် ကလေးငယ်တစ်ဦးဟာ Covid-19 ရောဂါဆိုးကို အောင်အောင်မြင်မြင် တွန်းလှန်ပြီး ကျန်းမာရေး ပြန်ကောင်းမွန်လာနေပြီ ဖြစ်ပါတယ်။
ဘန်ကောက်မြို့တော်က ကူးစက်ရောဂါ ဆေးသုတေသန ဌာနတစ်ခုရဲ့ ပညာရှင်တွေက ဆေးဝါးဆိုင်ရာ သုတေသီတွေ၊ အထူးကု ဆရာဝန်ကြီးတွေနဲ့ အနီးကပ် ဆွေးနွေး တိုင်ပင်ပြီး ကလေးငယ်အတွက် အသင့်တော်ဆုံး ဖြစ်နိုင်မယ့် ဗိုင်းရပ်စ် ကုသဆေးဝါးတွေကို ရောစပ် စီစဉ်ပေးခဲ့ပါတယ်။
ဒီကုထုံးဟာ အလုပ်ဖြစ်ခဲ့ပြီး အခုတော့ ကလေးရဲ့ ကျန်းမာရေးက ပြန်လည် ကောင်းမွန်နေပါပြီ။
ကလေးငယ်ကို တိတိကျကျ ကန့်သတ်ထားတဲ့ ဗိုင်းရပ်စ် ကုသဆေး အရောအနှောတွေနဲ့ ကုသပေးခဲ့ကြောင်း၊ ကုထုံးအတွက် ၁၀ ရက်လောက် အချိန်ယူခဲ့ရကြောင်း ကလေးဆေးပညာ ဆရာဝန်ကြီး ဒေါက်တာ ဗီဆဲလ် မူလာဆတ်က ပြောကြားခဲ့ပါတယ်။
ယောက်ျားလေး တစ်ယောက်ဖြစ်တဲ့ ကလေးငယ်ကို နေ့တိုင်း ကျန်းမာရေး စစ်ဆေးမှုတွေ ပြုလုပ်ခဲ့ကြောင်း၊ သုံးရက်ကနေ ငါးရက်အတွင်း ကျန်းမာရေး သိသိသာသာ တိုးတက်လာတာကို အတည်ပြုလာနိုင်ခဲ့ကြောင်း ဒေါက်တာ မူလာဆတ်က ဆိုပါတယ်။
အဲဒီကလေးငယ်ဟာ ထိုင်းမှာ Covid-19 ရောဂါ ကူးစက်ခံရတဲ့ အသက်အငယ်ဆုံး လူပုဂ္ဂိုလ် အနေနဲ့လည်း မှတ်တမ်းဝင်လာခဲ့ပါတယ်။
တစ်နှစ်အောက် ကလေးတွေကို ကုသရာမှာ ဆေးဝါးတွေ သုံးစွဲဖို့ ကန့်သတ်ချက်တွေ များပြားလွန်းပေမယ့် ဘန်ကောက်က ဆရာဝန်တွေကတော့ သတိကြီးကြီးနဲ့ လေ့လာ တွက်ချက်ထားတဲ့ ဆေးဝါး ပေါင်းစပ်မှုတွေကို အသုံးပြုခဲ့ကြပါတယ်။
ကလေးအများစုမှာ ရောဂါကူးစက် ခံရရင်တောင် ပြင်းထန်မှုက လူကြီးတွေလောက် မဆိုးရွားဘူးလို့လည်း ဒေါက်တာ ဗီဆဲလ်က ပြောပါတယ်။
ထိုင်းနိုင်ငံမှာ Covid-19ရောဂါ အတည်ပြုလူနာ ၂၈၀၀ ကျော် တွေ့ရှိထားပြီး ၅၀ နီးပါး သေဆုံးခဲ့ပါတယ်။
ပြီးခဲ့တဲ့ ရက်ပိုင်းတွေအတွင်း နေ့အလိုက် ရောဂါကူးစက်နှုန်း ကျဆင်းလာတာ တွေ့ရပေမယ့် ဒီအရှိန်ကို ဆက်ထိန်းဖို့ဆိုရင် လူတွေ အိမ်အပြင် မထွက်ကြဖို့၊ လူအချင်းချင်း ထိတွေ့မှု လျှော့ချမယ့် သတ်မှတ်ချက်တွေကို တိတိကျကျ လိုက်နာကြဖို့လိုကြောင်း ထိုင်းအာဏာပိုင်တွေက သတိပေးထားပါတယ်။
Subscribe to our channel at [ Ссылка ]
Check out our website: [ Ссылка ]
Connect with us at our social media handles:
Facebook: [ Ссылка ]
Twitter: [ Ссылка ]
