Тараз қаласының жүзге жуық тұрғыны наразылық шеруіне шықты. Бұқараны бұл қадамға жергілікті биліктің бейқамдығы итермелепті. Ауыз судың азабы, көгілдір отын мен жарықтың жоқтығы сынды жыл санап жамалған мәселелер тұрғындардың титығына тиген. Әлеуметтік мәселелерден әбден мезі болған жұрт, енді тоқтаусыз шеру арқылы әкімшілік назарын аударуды көздеп отыр.
Шөлдала ауылы осыдан екі жыл бұрын ауданнан Тараз қаласының қарамағына өткен. Шаһарға енгенмен шырайы кіргені шамалы деп шулайды жұрт. Қалада тұрып қоғамнан тысқары қалыпты.
ҚОНАРБАЙ КЕНЖЕҚҰЛОВ, Шөлдала ауылының тұрғыны:
Не жарық жоқ. Не суы жоқ. Не газы жоқ. Қаңғып жүрген ел. Қазір енді Таразға кіргеннен кейін құжаттың бәрін қайтадан жасап жатыр.
1500 тұрғыны бар ауылдың тұрғындары толғағы таусылмаған тоқсан түрлі мәселені айтып шуласты. Әлеуметтік нысандардан жұрдай ел ауылда қылмыс саны да артқанын айтады. Бар мәселені жіпке тізгендей жиып теріп әкімшілікке жеткізгенмен екі жылдан бері ақжағалылар ат басын бұрмапты.
РАБИҒА ТӨЛЕЕВА, ШӨЛДАЛА ауылының тұрғыны:
Қалаға өткелі екі жылға қарап кетті. Бір әкім хабарласып халықтың жай-жапсары қалай ау? Анда-санда бір жұмыс жоспарларына кіргізбей ма?Хабар алайық деп. Әкім дегеннің түсінде білмейміз тұрпатын да білмейміз.
Жұртты жыламсырар күйге түсірген жалғыз ауыз су жыры емес. Елеусіз қалдық деген ел көгілдір отынға зәру. Жарыққа да жарымай отыр. Қоғамдық көлікпен қатынауда қиынның қиыны. Қордаланған көп мәселеден билік бейхабар емес бейқам деп ашынады ел.
