Ақжол Түменбай

Ақ гүлге неге, құмармын жаным,
Ақтығын сүйдім ғаламның.
Ақ жолда жүрген шығармын жаным,
Ақ сүтін емдім анамның.

Қосылмай кеткен қос ғашықтардың
Жете ме бізге ақылы.
Сүйдім деп сосын достасып тындым,
Қоштасып тындым ақыры.

Айнымас досым жалғыздық болған,
Сәтсіздіктер де баянды.
Жер бетіндегі жалғыздықтардан
Жүрегім ғана аяулы.

Ай да жылайды, қайран қалғанмын
Тамады гүлге шық қайғы.
Жүрегі тасқа айналғандардың,
Көзінен жас та шықпайды.

Оңаша десең, боз үй табармын,
Кеудемде менің көп күмбір.
Махаббат жайлы музыкалардың
Мелодиясы мөп-мөлдір.

Уақытты жеңгім келеді менің,
Шығады бір күн адал дем.
Бақытты болғым келеді менің
Өзімді сүйген адаммен.

Бақытты болу қандай мағына?
Үміті нәзік бәрінің.
Қош келдің менің маңдай бағыма
Жүрек бейнелі жарығым.

Тыңдайсың кімнің жастық өлеңін?
Қара көздерің мөлдіреп.
Мен сені жаным жақсы көремін,
Алғашқы және соңғы рет.

свернуть