#SteakHouse #Ferizaj #Bombola #Shpërthim #Kosova
Gjithçka që dihet rreth shpërthimit të sotëm në Ferizaj që la të plagosur 43 persona
Një shpërthim i fuqishëm ka goditur sot qytetin e Ferizajit, saktësisht një lokal ‘Steak House’ pranë një qendre tregtare me ç’rast kanë mbetur të lënduar 43 persona.
Ngjarja ka ndodhur sot rreth orës 15:00, shkruan lajmi.net.
Fuqia e shpërthimit, për të cilin dyshimet e para thonë se është shkaktuar nga bombola e gazit ka qenë tejet e lartë saqë është krahasuar me tërmet dhe kjo mund të shihet edhe në videot e publikuara të kapura nga kamerat e sigurisë.
Nga fuqia e madhe e shpërthimit u lënduan edhe persona të cilët kanë qenë jashtë lokalit brenda të cilit ka ndodhur shpërthimi, ndërsa gjithashtu janë dëmtuar edhe dritaret e ndërtesave përreth.
Për të evituar rreziqet dhe si shkak i traumës, banorët rreth lokacionit ku ka ndodhur shpërthimi janë evakuar me kohë nga autoritetet kompetente.
Nga shpërthimi që goditi sot Ferizajin të lënduar kanë mbetur 43 persona, prej tyre 15 me lëndime më të rënda dhe me djegie të shkallës së tretë e të katërt, madje deri në 50 për qind.
Për vizitë pacientëve iu kanë shkuar kryetari i komunës së Ferizajit, Agim Aliu dhe ministri i Shëndetësisë, Armend Zemaj.
Zemaj në vizitën e tij në QKUK është shprehur se pacientët po marrin trajtimin e duhur profesional në bazë të kapaciteteve të Qendrës Klinike Universitare të Kosovës.
Ndërsa në anën tjetër, kryetari i Ferizajit, Aliu është shprehur se është përjetim dhe janë pamje të tmerrshme ato të ditës së sotme në Ferizaj.
Nga pacientët me plagë të rënda në QKUK rreth 9 prej tyre është dashur t’i nënshtroheshin operimit për shkak të djegieve dhe thyerjeve.
Lidhur me rastin përveç autoriteteve kanë folur edhe dëshmitarë të rastit.
Xhemajl Idrizi, qytetar nga Vitia, në kohën kur ka ndodhur shpërthimi ka qenë pranë lokaleve.
“Ishim në një restorant duke pirë kafe dhe po dilnim në drejtim të makinës diku 15 metra afër ngjarjes kemi dëgjuar një shpërthim shumë të fortë dhe menjëherë xhamat e shitoreve u thyen. Ne kemi parë në një shitore dy vajza të reja dhe një grua, ishin shumë të shqetësuara e të trishtuara, unë isha me mbesat e mija dhe ofruam ndihmën edhe psikologjike edhe nga mundësia t’i evakuojmë sepse unë mendoja mund të ketë shpërthim të dytë e ajo është më rrezik, i larguam nga shitorja, njëra ka qenë e lënduar në kokë ka pasur edhe gjakderdhje, atë mbesa dhe nipi e kanë dërguar në Urgjencë në Ferizaj, kurse vajzën e dytë 10 minuta jemi munduar ta qetësojmë”, tha ai.
Lidhur me gjendjen e pacientëve në QKUK kanë folur edhe mjekët kujdestarë të cilët kanë treguar se aktualisht janë jashtë rrezikut për jetë, por në gjendje të rëndë.
E për gjendjen e rëndë të pacientëve e ka konfirmuar edhe fakti se kryetari i Ferizajit, Agim Aliu ka përshpejtuar procedurat që ata të vazhdojnë procedurat e trajtimit dhe të shërimit në Turqi.
“Po bëjmë përpjekje maksimale që për të lënduarit në gjendje më të rëndë, ta lehtësojmë procedurën për shërim në Republikën e Turqisë, sipas rekomandimeve të mjekëve, pas vendosjes së kontakteve nga Komuna e Ferizajt bashkë me Ministrinë e Shëndetësisë, Shërbimin Spitalor Klinik-Universitar të Kosovës dhe kërkesës tonë pranë Ambasadës së Turqisë në Kosovë.”, ka thënë Aliu.
Numri i pacientëve të cilët janë cilësuar në gjendje më të rëndë shëndetësore dhe janë trajtuar në QKUK është 15, por nuk dihet nëse për të gjithë është i domosdoshëm udhëtimi drejt Turqisë për t’u shëruar.
Lidhur me këtë shpërthim kanë reaguar krerët politikë të vendit duke bashkëndjerë me familjarët e të plagosurve dhe duke uruar shërim sa më të shpejtë.
Shpërthimi i sotëm ka goditur rëndë qytetin e Ferizajit, ku të gjithë qytetarët e Kosovës po solidarizohen dhe po i drejtojnë lutjet kah shërimi sa më i shpejtë i të plagosurve. /Lajmi.net/

свернуть