#bbcuzbek Россия, мигрантлар, «Полиция сизларга нон-сув берсин»
Москвадаги «Измайлово» меҳмонхонасининг 120 нафарга яқин ишчилари февраль ойидан буён иш ҳақини олиша олмаяпти. Меҳмонхонанинг Би-би-си ўзбек хизматига мурожаат қилган ўзбекистонлик ишчиларига кўра, "Трейднефтетрэвел" МЧЖнинг ишчилардан қарздорлиги жами 3 млн рублдан зиёд.
Иш ҳақини талаб қилиб борган муҳожирлар эса бинога киритилмаяпти, полиция чақириш билан таҳдид қилинмоқда.
Меҳмонхона ишчилари юборган видеотасвирларда «Измайлово» қўриқчиси аёлларни бир неча бор «кўчага чиқинглар» деб ҳайдагани кўринади. Аёллар раҳбарият билан гаплашишни сўрашган. Аммо улар бинога киритилмаган.
- Беш-олти марталаб бордик, аммо бизни киритишмаяпти. Хизматчилар учун эшиклар киринг дейишади. У томонга ўтсак, у ердан ҳам ҳайдашаяпти. Пулимиз тугаган, квартира тўлашга ҳам имконимиз йўқ. Меҳмонхонанинг бўш ётган қаватларида вақтинча яшаб турайлик, деб илтимос қилдик. Бизни фақат қўпол гапириб ҳайдашаяпти, - дейди Азиза исмли бухоролик муҳожир.
Бир кадрда мигрантларнинг меҳмонхона ходими билан суҳбатлашишга муваффақ бўлгани кўради.
- Нонга, сувга пулимиз қолмади. Ким бизни тушунади? Ўзингизни бизнинг ўрнимизга қўйиб кўринг. Ҳеч бўлмаса, иш ҳақимизни беринг – ёлворишган аёллар.
Аммо мигрантлар Ирина Юрьевна деб атаган меҳмонхона ходими уларга овозини баландлаб, полиция чақиришини айтган.
- Бунақа йиғинлар билан ўзингизга ёмон қиласиз. Сизларни полиция олиб кетади. Полиция сизларга нон-сув берсин, - дейди ходим аёл.
Маълум бўлишича, мигрантлар "Трейднефтетрэвел" МЧЖ да ноқонуний ишлашган. Уларнинг меҳмонхонада ишлаганини тасдиқловчи бинога кириш рухсатномаси ва ойлик маошлар ёзилган рўйхатлар бор.
Би-би-си ўзбек хизмати бу борада «Измайлово» меҳмонхонаси ва "Трейднефтетрэвел" МЧЖ масъулларига мурожаат қилди, аммо аниқ бир жавоб ололмади.
Менежер Елена Кравченко эканлигини тасдиқлаган аёл Би-би-си номини эшитгач телефонни ўчирди. Қайта-қайта уринишларимиз самара бермади. Ватсап орқали ёзган хабаримизга жавоб келмади ва бизни блоклади.
Директор Ольга Борисовна эса март ойидан бери даволаниш таътилида экани, ҳеч нарсадан хабари йўқлигини айтди.
Видеода кўринган Ирина Юрьевна эса телефонга жавоб бермади, юборган хабаримизга «номерда адашдингиз» деган жавобни юборди.
3 ойдан буён иш ҳақи ололмаётган мигрантлар вазиятлари юзасидан миграция агентлиги ва элчихона томонидан ёрдам сўрашмоқда.
BBC News O'zbek - BBC News O'zbek tilida, onlayn, TV va ijtimoiy tarmoqlarda
![](https://i.ytimg.com/vi/cUTpmsjQIpM/maxresdefault.jpg)