Азық-түліктің бағасы негізсіз көтерілмейді. Қалалық әкімдік бүгін қаладағы кәсіпкерлерді жиып, меморандумға қол қойды. Келер жылы ірі супермаркеттер әлеуметтік маңызы бар азық-түлікке қосылатын үстемеақыны 10 пайыздан асырмайды. Бұл тек әлеуметтік маңызы бар тауарларға қойылатын талап. Ал сүт және сүт өнімдерін, ет өнімдері мен көкөніс шығаратын ірі тауар өндірушілер ішкі нарыққа басымдық береді. Яғни, бұған дейін жергілікті жерде өндірілетін тағамдарды сырт елге, өзге облыстарға шығаруға асығатын болсақ, енді өзімізді толық қамтамасыз ету міндеттелді. Ал ірі сауда орындары жалға беретін орындардың құнын қымбаттатпайды. Сонымен қатар, жергілікті тауар өндірушілерге орын ұсыну міндеттелді. Бағаны тұрақтандыру мақсатында жасалған меморандум аясында жергілікті әкімдік кәсіпкерлерге жан-жақты ақпараттық қолдау көрсетуге уәде берді. Қай жерде қандай жеңілдіктер бар екені халыққа әкімдік сайты арқылы жеткізіліп отырады.
Ещё видео!