"Токио 2020" зуны олимпын 32 дугаар наадмын жудо бөхийн тэмцээний эхний өдөр эрэгтэйчүүдийн хамгийн хөнгөн жин буюу 60 кг, эмэгтэйчүүдийн хамгийн хөнгөн 48 кг жингийн барилдаанууд боллоо.


Токиогийн олимпын наадмын жудо бөхийн тэмцээний татамид эрэгтэйчүүдийн 60 кг жинд Монгол Улсын Гавьяат тамирчин Дашдаваагийн Амартүвшин, эмэгтэйчүүдийн 48 кг жинд Монгол Улсын Гавьяат тамирчин Мөнхбатын Уранцэцэг нар барилдлаа.


Монгол Улсын Гавьяат тамирчин Дашдаваагийн Амартүвшингийн хувьд Недерландын бөхөд ялагдсанаар тэмцээнээ дуусгасан бол, эмэгтэйчүүдийн 48 кг жинд барилдсан Монгол Улсын Гавьяат тамирчин Мөнхбатын Уранцэцэг 1-р тойрогтоо гоц мөргөсөн, 2-р тойрогтоо Чилийн бөхийг ялж, 3-р тойрогтоо Израилийн бөхтэй учраа таарч барилдсан. Энэ хариуцлагатай барилдаандаа манай тамирчин М.Уранцэцэг Израилийн бөхийг ялснаар хагас шигшээ барилдаанд шалгаран үлдсэн юм. Жингийнхээ хагас шигшээ барилдаанд манай тамирчин М.Уранцэцэг эмэгтэйчүүдийн 48 кг жингийн хүчтэй өрсөлдөгчдийн нэг Косовагийн тамирчин Дистрия Красникитай учраа таарч барилдсан. Энэ барилдаанд манай тамирчин М.Уранцэцэгийн хувьд өрсөлдөгч тамирчиндаа ялагдсан ч хүрэл медалийн төлөө барилдах эрхтэй болсон юм.


Ингээд хүрэл медалийн төлөөх барилдаанд Португал улсын тамирчин Катарина Костатай учраа таарч барилдсан. Олимпын наадмын медалийн төлөөх энэ хариуцлагатай барилдаанд манай тамирчин М.Уранцэцэг өрсөлдөгчөө ялснаар "Токио 2020" зуны олимпын 32 дугаар жудо бөхийн эмэгтэйчүүдийн 48 кг жинд хүрэл медаль хүртсэн амжилт үзүүллээ.


#MNB #МонголынМэдээ #ЦагийнХүрд

свернуть