ELBASAN - Megjithëse bëhej fjalë për para të marra vite më parë hetimet nga Policia e Elbasanit ndaj biznesmenit Xhevat Rira, kanë nisur në mars të këtij viti. Sipas Drejtorit të Policisë Elbasan, Neritan Nallbati seksioni i krimit ekonomik ka siguruar dëshmitë dhe provat duke e dorëzuar dosjen në prokurori për një periudhë dy mujore.
Pas përfundimit të hetimeve Prokuroria e Elbasanit ka vendosur që t’i kërkojë Gjykatës së këtij rrethi, masën e sigurisë “arresti me burg” ndaj biznesmenit.
Menjëherë pas sigurimit të urdhërit të arrestit nga gjykata, policia e Elbasanit ka bërë edhe arrestimin e Rirës. Denoncimet janë bërë në harkun kohor të viteve 2012, 2013 deri në nisjen e hetimit në 2014. Mësohet se ata që e kanë denoncuar janë edhe kushërinj me të arrestuarin.
Pritet që Gjykata e Elbasanit të bëjë rivlerësimin e masës së sigurisë për shtetasin Xhevat Rira.
Xhevat Rira, 65-vjeçari është administrator i një ndër firmave të para në Shqipëri në fushën e hidrokarbureve, “RIRA sh.a”, e cila shpalli falimentin, dhe paratë e marra kundrejt një interesi prej 22% humbën në këtë faliment.
Të zhgënjyer për çfarë kishte ndodhur disa familje në Përrenjas kanë vendosur t’i drejtohen policisë dhe më në fund është bërë arrestimi i shtetasit Xhevat Rira. Ata kërkojnë gjithashtu të zbardhen pasuritë e Xhevat Rirës dhe t’i kthehen paratë që kanë 10 vjet që i kërkojnë.
Biznesmeni Xhevat Rira u arrestua dje pasi sipas Prokurorisë ai kishte zgjedhur të ndërtonte një skemë piramidale, duke marrë tek persona të ndryshëm sasi deri 30 milionë lekësh, me premtimin se do jua kthente me interes më të lartë.
