«Մշակութային և սոցիալական նարատիվների լաբորատորիան» երկար տարիներ իրականացնում է քաղաքային տարածությունների հիշողության նախագծեր։
Հերթական հետազոտությունն արվել է Թուրքիայի Ստամբուլ քաղաքում՝ Բալաթ բազմաէթնիկ ու բազմամշակույթ անցյալով հարուստ թաղամասում։ «Բալաթ․ապրել միասին» հետազոտական աշխատանքը թաղամասի սոցիալական, քաղաքային հիշողության բացահայտումներն են տարբեր գիտակարգերի հեղինակների՝ մարդաբանների, պատմաբանների, նշանաբանների, ճարտարապետների կողմից, թաղամասի ներկայիս կյանքը համեմատելով բյուզանդական ժամանակաշրջանից մինչև 20-րդ դարի ողբերգական իրադարձությունները։
«Մենք փորձել ենք ուսումնասիրել և հասկանալ, թե ինչ ձևեր են եղել համակեցության և ինչ համաձայնություն է եղել այդ խմբերի միջև։ Արխիվը ցույց է տալիս, որ յուրաքանչյուր կոնֆլիկտային իրավիճակում բոլոր էթնիկ խմբերի ներկայացուցիչները կարողացել են ձևավորել ժողով և համաձայնության գալ, միայն անլուծելի կոնֆլիկտների դեպքում դիմել են դատարանին։ Այսինքն իրենք ունեցել են իրենց համակեցության ներքին կանոնները», – ասում է գրքի խմբագիր, բանասիրական գիտությունների թեկնածու «Մշակութային և սոցիալական նարատիվների լաբորատորիայի» հիմնադիր Տիգրան Ամիրյանը։
Տիգրան Ամիրյանն ասում է, որ գրքի նպատակը երկխոսություն ստեղծելն է։ Բալաթի հիշողության և հետհիշողության միջոցով խոսելը համակեցության ձևերի ու ժամանակի մեջ դրանց փոխակերպումների մասին։
![](https://s2.save4k.ru/pic/d_NI6VDp290/maxresdefault.jpg)