17.10.19 Әл-Фараби атындағы ҚазҰУ-да 4-ші Халықаралық Түркі Дүниесі деректі фильмдері фестивалінің қазақстандық бағдарламасы өтіп жатыр. Кинофестивальге Түркия, Қазақстан, Түркіменстан, Босния және Герцеговина, Қырғызстан, Әзірбайжан, Өзбекстан, Венгрия, Македония, Кипр елдері жетекші серіктес-университеттерінің үздік жұмыстары қатысуда.
Фильмдер әлеуметтік, мәдени, рухани және қоғамдық маңызды тақырыптарды, жастар тәрбиесін қамтиды.
4-ші Түркі Дүниесі деректі фильмдері фестивалінің салтанатты ашылуы әл-Фараби атындағы ҚазҰУ-да өтті. Оған кинематограф аңызы, түркі әлемінің танымал актері әрі режиссері Асанәлі Әшімов, Түркі әлемі журналистер федерациясының президенті Мендерес Демир және басқа да шетелдік құрметті қонақтар, сондай-ақ киноқұжатшылар мен фильмдердің авторлары, масс-медиа өкілдері, ЖОО студенттері қатысты.
Асанәлі Әшімов кинофестивальде рухты өлең-жырларын оқып, студент жастарға игі тілегін жеткізді. «Жақсы оқыңыздар! Сонда елге пайда келтіресіздер, атақ-абырой әкелесіздер. Соған тырысыңыздар! Үлкен елдердің қатарына қосылайық. Біз ешкімнен кем емеспіз. Білімді болыңыздар. Мен сіздерді соған шақырамын!», - деді.
Түркі Дүниесі журналистер федерациясының президенті, Кинофестиваль комитетінің төрағасы Мендерес Демир түркі дүниесінің құндылықтарын әлемге паш ететін кинофестиваль ұйымдастырушыларына, қолдау танытып отырған ҚазҰУ-ға алғысын жеткізді. Бұл шараның тараптар арасындағы мәдени, рухани байланысты арттыра түсетінін айтты. Фестивальдің ашылуы кезінде тараптар кәдесыйлар алмасып, марапат рәсімі орын алды.
Көрермен ҚазҰУ Телерадиокешені дайындаған "Әл-Фараби - өркениет философы" деректі фильмін тамашалады.
4-ші Түркі дүниесі деректі фильмдер фестивалінің ашылуынан кейін жиналғандар"Керемет" СҚКО-да кино көрсетілімдерді тамашаласа, түркі елінен келген қонақтардың жартысы Халықаралық қатынастар факультетіне кездесуге барды.
Кездесуде Түркі әлемі журналистер федерациясының президенті Мендерес Демир халықаралық қатынастар факультетінің деканы Сағынғали Айдарбаевқа, Дипломатиялық аударма кафедрасының меңгерушісі Алмаш Сейдикеноваға және оқытушы Сафура Бөрібаеваға Алғыс хат тапсырса, "Кереметтегі" кинокөрсетілім соңында Фестивальдің вице-президенті Исмайл Кахраман ҚазҰУ Телерадиокешенінің директоры Дәурен Мұхамеджановты дипломмен марапаттап, арнайы мүсіншені сыйға тартты.
Кинофестиваль аясында байқаудан өткен студенттердің және кәсіби мамандардың деректі фильмдері көрермен назарына ұсынылды. Бұл фильмдерді жыл соңына дейін "Керемет" СҚКО орталығының кинотеатрында тамашалауға болады.
Түркі дүниесі кинофестивалі бағдарламасы 18 қазанда түске дейін ҚазҰУ-да, түстен кейін ҚазҰӨА-да жалғасады.
«Жыл сайын фестиваль өзінің тынысын кеңейтіп келеді. Жалпы түркі мұрасын сақтауға, ұлттық ерекшелікті насихаттауға және түркітілдес мемлекеттердің шығармашылық интеграциясын нығайту ісіне арналған кинофестивальді өткізу біз үшін үлкен мәртебе. Бұл эстафетаны біз жақсы әріптесіміз - Стамбул университетінен қабылдап алдық. Бірнеше күн бұрын Бакуде өткен түркітілдес мемлекеттердің ынтымақтастығы Кеңесінің 7-ші отырысында біздің көшбасшымыз, Елбасы Нұрсұлтан Назарбаев мәдениет, білім және жастар саясаты бағдарламаларына «Түркі келешегі - 2040» бағдарламасын қосуды атап өтті. Кинофестивальді өткізу – осы талапқа сай келеді», - деді фестиваль ашылуында ҚазҰУ бірінші проректоры Мұхамбетқали Бүркітбев.
www.kaznu.kz
#ТүркіДүниесіДеректіФильмдерФестивалі #AlFarabiUniversity #TRCKazNU
