Nga kërkimet e familjarëve mësohet se atë ditë që i riu ishte në Greqi, ka komunikuar me një bari grek, ndërsa ky i fundit mësohet të ketë thënë se iu lut të qëndronte atë natë, pasi kishte rënë nata. Sipas të njëjtës dëshmi bërë familjarëve bariu grek i ka dhënë Erjonit dhe ndërresa të reja. Më pas është larguar duke i thënë se do shkonte në drejtim të Katerinit, atje ku ndodhej edhe një tjetër i Erjonit.
Familjarët kanë ndjekur të njëjtin itinerar sipas gojëdhënave duke kërkuar në Katerini, por as atje nuk kishte shkuar Erjoni. Këtu lindën dyshimet e para se Erjoni po gënjente në lëvizjet që po bënte. Arsye të cilën familjarët nuk e dijnë ende. Arditi, vëllai që kërkon vëllanë, komunikoi për herë të fundit me Erjonin më 8 mars, kur ky i fundit i pohon se jam mirë dhe kam dalë për kafe. Ky ishte pohimi i fundit dhe i vetëm i të riut bërë familjarëve.
Moderatorja e 'Pa Gjurmë', Odeta Dume u vendos në kontakt nga studioja televizive me personin e fundit që ka pasur të bëjë me Erjon Gjolenan, Pëllumb Mucën. Pëllumbi menjëherë pasi ka ngritur telefonin, ka filluar të tregojë udhëtimin që ka ndarë me Erjonin për afro 4 ditë.
