#reportTV #lajmeshqip #lajme
Inaugurimi i shtëpisë së re të 34-vjeçarit Klajdi Shundi dhe festimi i ndërrimit të viteve me motrën e tij, kunatin dhe dy mbesat është kthyer në tragjedi mëngjesin e 1 janarit 2021 te zona e "5 majit" në Tiranë.

Klajdi Shundi do të qëndrojë në qeli deri në përfundim të hetimeve ndërsa gjatë festimeve mes kunatit të tij dhe motrës së Klajdit ka nisur një debat. Sipas detajeve të mësuara nga ReportTv, Klajdi Shundi ka ndërhyrë duke i kërkuar të mos zihen në shtëpinë e tij pasi janë mbledhur për festë.

Gjithçka ka shkuar mirë deri rreth orës 3 të mëngjesit ku para ngjarjes të gjithë kanë bërë një foto së bashku për kujtim. Ky kujtim i bukur do  të përmbysej në pak sekonda më pas, duke u kthyer në tragjedi. Kur Lavdi Zvezhda do largohej me gruan e dy vajzat ai është konfliktuar sërish me të shoqen, Silvën. Mbesa e madhe ka telefonuar dajën, Klajdin duke i thënë "daja mami e babi po zihen, eja të lutem“. Kur Klajdi Shundi ka dalë tek shkallët e pallatit ka patur në dorë një thikë dhe ka parë kunatin duke u zënë me të motrën.

Kaq ka mjaftuar dhe ai ka goditur Lavdi Zvezhdën me thikë e për pasojë i ka shkaktuar plagosje të rëndë. Zvezhda është dërguar në spital por pa mundur t'i mbijetojë plagëve e për pasojë ka ndërruar jetë.

ReportTv mëson se Shundi kishte pak kohë që ishte kthyer nga Italia dhe në Shqipëri po riniste jetën duke marrë dhe një apartament ku festoi para tragjedisë me motrën, kunatin dhe dy mbesat.

свернуть