Отандық бұқаралық ақпарат құралдары Мәжіліс пен мәслихат депутаттарын сайлау науқаны кезінде шынайы әрі әділ ақпарат таратуға уағдаласты.
Бүгін «Бас редакторлар» клубының жиынында телерадио және мерзімді басылымдардың басшылары бас қосып, сайлауда этикалық нормаларды сақтау туралы Хартия қабылдады.
Клуб мүшелері саяси науқанның демократиялық тұрғыда халықаралық талаптарға сай, әділ де ашық өтуіне ақпарат құралдары бір кісідей жұмылуы керектігін айтты.
Сайлау тақырыбына арналған барлық материалдардың бейтарап сипатта болуы үміткерлерге қатысты әділдіктің сақталуына ықпал етеді. Сондықтан құжатта кандидаттардың абыройы мен іскерлік беделіне, жеке басына нұқсан келтіретін ақпараттарды таратпау секілді бағыттар қаралған.
Бір сөзбен айтқанда, сайлауда мәлімет тарату талаптары толық қамтылған. Құжатты қазір ірі телеарна мен басылымдар мақұлдап отыр.
Бибігүл Жексенбай, «Бас редакторлар» клубының президенті
-Әріптестеріміздің осы саяси науқан кезіндегі жауапкершілігін тағы бір естеріне салып, өз міндеттеріне үлкен жауапкершілікпен қарауын назарға алу үшін арнайы Хартия қабылдап отыр. Өздеріңіз білесіздер, бұл «Бас редакторлар» клубы 10 жылдай жұмыс істеп келе жатыр. Бұл үшінші сайлауға арнайы Хартия қабылдап отырмыз. Біздің қазір 250-ден аса мүшелеріміз бар бүкіл республика бойынша. Менің ойымша осы тек ғана «Бас редакторлар» клубына мүше емес басқа да әріптестеріміз, барлық журналистер бұл Хартияға өз үндерін қосады деп сенеміз.
