Сириядағы қантөгіс уақытша болса да тоқтайтын болды. Елді қырғынға ұшыратқан Үкімет пен оппозиция ақпанның 27-сінен бастап бітімге келеді.
Бұл мерзімді АҚШ пен Ресей бекітті. Ресми Мәскеу Сирия үкіметіне бітім талаптарын орындатуды өз мойнына алса, Вашингтон ықпалындағы оппозициялық топтарға басу айтуы тиіс. Атысты тоқтату талаптарына сәйкес, аймақтағы соғыс отын өршітіп жүрген қарулы ұйымдар 26 ақпан күні 00.00-сағатқа дейін оқ атуды доғарып, келісімге қосылатындарын қуаттауы тиіс.
Сонда ғана олар Ресей мен АҚШ бастаған коалициялық күштердің бомбалауынан құтылады. Алайда «Ирак пен Леванттың террористік тобы» секілді содырларға қарсы әскери қимылдар жалғаса береді. Сарапшылар: «Бұл келісім – Сириядағы соғысты біржола тоқтатуға сеп болуы мүмкін», – дейді.
Стефан Дюжаррик, БҰҰ бас хатшысының ресми өкілі
-Бұл – бес жыл бойына бейбіт өмірді үміт етіп келген Сирия халқы үшін тарихи күн. Пан Ги Мун тараптарды бекітілген бітім талаптарын бұзбауға шақырады. Оларды орындау үшін әлі де көп жұмыс істеу керек .
