Հունվարի 29-ի մամուլի ասուլիսում ՀՀ ԱԳ նախարար Էդվարդ Նալբանդյանին հարց ուղղվեց քրեական և բիզնես աշխարհում Ռոբսոն անունով հայտնի Ռուբեն Թաթուլյանի մասին, թե արդյո՞ք իրեն չի հուզում, որ իր նախկին խորհրդականի անունը կապվում է հանցավոր աշխարհի հետ: Էդվարդ Նալբանդյանը պատասխանեց, որ նա ԱԳ նախարարի խորհրդական է եղել 2016 թվականի կեսերից մինչև 2017 թվականի վերջերը և զբաղվել է Ռուսաստանի հարավային շրջաններում հայ համայնքի հետ կապված հարցերով: Հարցի մյուս մասին նախարարը չանդրադարձավ:
Հիշեցնենք, որ հունվարի 9-ին տարածվեց Ռուբեն Թաթուլյանի հարցազրույցը բլոգեր Ալեքսանդր Վոլովին, որի ժամանակ Թաթուլյանն իր դիվանագիտական անձնագրի առկայությունը բացատրեց նրանով, որ Հայաստանի արտաքին գործերի նախարարի խորհրդականն է:
Ռուբեն Թաթուլյանը, հիշեցնենք, 2015-ին ՌԴ-ում ձերբակալվեց, 17-ին՝ Չեխիայում, մի դեպքում օրենքով գողերի հավաքը ցրելու, մյուս դեպքում՝ «օրենքով գողերի» թագադրման ժամանակ:
Հարցազրույցից երեք օր անց՝ հունվարի 11-ին, լրագրողների հետ զրույցում ԱԳ փոխնախարար Շավարշ Քոչարյանը հայտարարեց. «Ռուբեն Թաթուլյանն ԱԳ նախարարի խորհրդական չի, եղել է արտահաստիքային խորհրդական և հայտնել է իր տեսակետը, որն ամենևին էլ ԱԳՆ-ի տեսակետը չէ»:

свернуть