رح غنّيلك قصّة فن ... خلّي عيونك بعيوني
صدّقي لوما قيس انجنّ ... كانت ليلى مجنوني
رح غنّيلك قصّة فن ...
***
صدّقي خاصمني السكوت ... جايي عبالي غنّي
وأوراق اشتاقت لبيوت ... والغزل ناطر فنّي
متمنّي إعشق لموت ... وعيش الأزل متمنّي
ومش همّي الجنّة ال ما بفوت ... ما إنتي عندي الجنّة
بإيدي اكتشفت الياقوت ... والكواكب كيف هنّي
ورشفت من رضابك توت ... وصبّيت الهنا بدمّي
لو صرتي عندي اللاهوت ... أصنام القدّ بيدعوني
رح غنّيلك قصّة فن ...
***
بيدعوني خطّلك قاف ... واحكي عن أمجاد القد
وعيوني اللي بترمي سلاف...علاني كحل ومرود
بلّورا الجوري شفاف ... كونها الباري عالقد
فجر الثّغر منمنم غاف ... لو فاق الشّمس بينعد
شو عملو فيّي الشفاف ... كيف بدّي منهن استد
والعنق لفتات زراف ... لفتة شوب ولفتة برد
وببقى من الله ما بخاف ... ان ما كمّلتك بفنوني
رح غنّيلك قصّة فن ...
***
ان ما كمّلتك بالكلمات ... شو نفع الأبجدية
إنتي رموز وحضارات ... آكاد وآرامية
صدرك سرّ الأهرامات ... خوفو وخفرع مبنيّة
منحوت حروز ونقشات ... بين ضلوعك مخفيّة
مصحف وانجيل وتوراة ... حسن من المجدليّة
وان مال الخصر حكايات ... فيي قولا وما فيّي
وهيهات اتصبّر هيهات ... إن جلتي بخاطر عظنوني
رح غنّيلك قصّة فن ...
***
إن جلتي بتتباهي بديباج ... يملج من كلّ الألوان
خليج وشطّ وأمواج ... وتلال بتغلي بركان
وجنينة من حولا سياج ... ما بيحلم فيها إنسان
ولو قمتي تمشي بغناج ... شو ذمبو مني الفستان
كيف ما بدّي عود احتاج ... فكّر بعبادة الأوثان
حاوي من كلّ الأبراج ... وبتعطيني من الميزان
قلبي عرش وإنتي التّاج ... خلقتي للعرش تكوني
رح غنّيلك قصّة فن ...
***
قلتلك قصتي وغنّيت ... شلت الهمّ ال جواتي
كلمات أشواقي عدّيت ... سامحيني عكلماتي
من يومٍ فيكي التقيت ... غيرتيلي حياتي
واني ما صدّقت انسيت ... شيّعت ذكرياتي
تاري لسّه ما ابتديت ... عم بتعلّم حكياتي
ومش عيب إن قالو اتربيت ... وعرفت بحبك ذاتي
ومش عيب إن قالو جنّيت ... العيب إن ما جنّ جنوني
رح غنّيلك قصّة فن ..
#السويداء #تراث_الجبل #تراث_جبلنا
[ Ссылка ]

свернуть