Yeni il və Dünya azərbaycanlılarının həmrəylik günü münasibətilə bayram günlərində əhaliyə xidmət göstərən dövlət qurumları gücləndirilmiş iş rejiminə keçir.
“Azəriqaz” İstehsalat Birliyindən verilən məlumata görə, qaz təsərrüfatında yarana biləcək problemlərin aradan qaldırılması üçün bütün lazımı tədbirlər görüləcək.
“Azərişıq” Açıq Səhmdar Cəmiyyəti də istirahət günlərində gücləndirilmiş iş qrafiki ilə xidmət göstərəcək. Qurumdan verilən məlumata görə, son illərdə yeni yarım stansiyaların istifadəyə verilməsi və köhnə elektrik kabellərinin təzələnməsi abunəçiləri 24 saat fasiləsiz elektrik enerjisi ilə təmin etməyə imkan verir.
“Azərsu” Açıq Səhmdar Cəmiyyətində bayram günlərində Mərkəzi idarə aparatı və yerli su kanal idarələri üzrə növbətçilik qrafiki tərtib edilib. Rəhbər işçilərin də daxil olduğu qruplar 24 saat ərzində abonentlərə fasiləsiz xidmət göstərəcəklər. Eyni zamanda, paytaxtın və bölgələrin su kanal idarələrinin qəza xidmətləri də operativ fəaliyyətlərini davam etdirəcəklər.
İstirahət günlərində bölgələrə üz tutmaq istəyən vətəndaşların sayı kəskin artır. Bunu nəzərə alan Bakı Beynəlxalq Avtovağzal kompleksi də gücləndirilmiş iş rejiminə keçib. Sərnişinlərin vaxtında mənzil başına çatması üçün xəttə əlavə 200 avtobus çıxarılıb.
![](https://s2.save4k.ru/pic/hsJNbR5N5P4/mqdefault.jpg)