#xəbərkanalı #xəbərvar #sosial #sosialyardım #nazirlərkabineti #qərar
Sosial yardımın alınması qaydaları sadələşdi.
Bu barədə Baş nazir Əli Əsədov qərar imzalayıb.
Yeni qərarla həmçinin hansı hallarda sosial yardımın təyin olunmasından imtina ediləcəyi də məlum olub.
Baş nazirin qərarı ilə “Ünvanlı dövlət sosial yardımın alınması üçün müraciət edilməsi, onun təyin olunması, verilməsi və verilməsindən imtina edilməsi Qaydaları”nda dəyişiklik edilib.
Qərara əsasən, bu Qaydaların məqsədləri üçün tələb olunan sənədlərin və ya məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və ya məlumatlar ərizəçidən tələb edilməyəcək.
Bu sənədlərin və ya məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi ərizəçinin razılığı ilə sorğu əsasında müvafiq dövlət orqanından (qurumundan) tələb olunur və ya ərizəçi tərəfindən təmin ediləcək.
Həmçinin, Notarius tərəfindən təsdiq olunmuş ərizə üzrə məlumatlar Azərbaycan Respublikası Ədliyyə Nazirliyinin “Elektron notariat” informasiya sistemindən bu Qaydaların 1.3.3-cü yarımbəndinə uyğun olaraq nazirliyin Mərkəzləşdirilmiş elektron informasiya sisteminin “Ünvanlı yardım” (VEMTAS) altsisteminə ötürüləcək.
Qərara əsasən, Təmsilçilik barədə ərizə bu Qaydaların 2.1-ci bəndinə uyğun olaraq təsdiq edildikdən sonra müraciət üçün 90 (doxsan) gün müddətində, sosial yardım təyin olunduğu halda isə sosial yardımın alındığı dövrdə qüvvədə olacaq.
Bundan başqa, yeni qərarla hansı hallarda sosial yardımın təyin olunmasından imtina ediləcəyi də açıqlanıb
Beləliklə, sosial yardıma növbəti dəfə müraciət etmiş ailənin əmlakı barədə məlumat düzgün göstərilmədikdə maddi-məişət şəraitinin müayinəsi aparılmadan ailəyə sosial yardımın təyin olunmasından imtina ediləcək.
Yeni qərara əsasən, Dövlət Sosial Müdafiə Fondunun struktur bölmələri və ya “DOST” mərkəzləri sosial yardım üzrə işçisi tərəfindən ailənin maddi-məişət şəraitinin müayinəsi aparılarkən aşağıdakı halların aşkar edilməsi səbəbindən sosial yardımın təyin olunmasından imtina edilməsi barədə müvafiq qərar çıxarıldıqda və həmin ailənin növbəti müraciəti zamanı bu hallar aradan qaldırılmadıqda maddi-məişət şəraitinin müayinəsi aparılmadan ailəyə sosial yardımın təyin olunmasından imtina edilməsi barədə müvafiq qərar çıxarılır:
Yəni, ailənin “Ərizə-bəyannamə”də göstərdiyi ünvan düzgün olmadıqda və ailənin əmlakı barədə məlumat düzgün göstərilmədikdə sosial yardımın təyin olunmasından imtina ediləcək.
Həmçinin qərara əsasən, aşağıdakı hallar istisna olmaqla, ailənin tərkibində dəyişikliklər baş verdikdə sosial yardımın ödənişi dayandırılacaq və ailənin sosial yardım almaq hüququna Təmsilçinin müraciəti əsasında yenidən baxılacaq:
- ailədə yeni uşaq doğulduqda və ya övladlığa götürüldükdə;
-ailə üzvü və ya üzvləri vəfat etdikdə (Təmsilçi istisna olmaqla);
- ailə üzvü müddətli həqiqi hərbi xidmətə çağırıldıqda və ya müddətli həqiqi hərbi xidmətdən ehtiyata buraxıldıqda;
- əmək qabiliyyətli olan ailə üzvünün birinci dərəcə əlilliyi olan şəxsə, 8 yaşına çatmamış uşağa və ya sağlamlıq imkanları məhdud 18 yaşınadək uşağa qulluq etməsi və ailənin əmək qabiliyyətli 23 yaşadək üzvünün əyani təhsil alması qeyd olunan müddətlər başa çatması başa çatdıqda.
![](https://i.ytimg.com/vi/i5ED_HNu3Xo/maxresdefault.jpg)