Arben Ristani, ish-sekretari i përgjithshëm i Partisë Demokratike, u paraqit këtë të martë në Prokurorinë e Tiranës lidhur me hetimet për paratë e lobimit të kësaj force politike në SHBA.
Ai u mor në pyetje nga Prokurorët e çështjes, Ervin Karanxha, Gjergji Tako dhe Kolë Hysenaj, të cilët kanë firmosur më herët edhe flete-thirrjen për kryetarin demokrat Basha, si dhe Ilir Dervishin, përgjegjës i financave në Partinë Demokratike.
Në dalje nga seanca e marrjes në pyetje, Ristani deklaroi se nuk ka firmosur asnjë pagese si zyrtar i PD-së. Ristani është i pari nga 3 zyrtarët e PD-së që u paraqit në organin e akuzës, pas refuzimit të bërë një ditë më para nga kryedemokrati Basha dhe financieri Dervishi.
Në letrën e djeshme drejtuar prokurorisë, Basha theksoi se thirrja konsiderohet shkelje e ligjit, pa prezantuar faktet mbi hetimin e parave te lobimit të PD në SHBA. Prokuroria e Tiranës e dërgoi shkresën mesditën e datës 12 Qershor, ku pas përfundimit të fazës paraprake hetimore prokurorët gjetën elemente të veprave penale të kryera nga Lulzim Basha, Arben Ristani dhe Ilir Dervishi./ABC News Albania 24/7
