ХАЛЫҚАРАЛЫҚ «ТҮРКСОЙ» ҰЙЫМЫ ӘЛ-ФАРАБИ АТЫНДАҒЫ ҚАЗҰУ СТУДЕНТТЕРІНЕ КЕЗЕКТІ ЫНТАЛАНДЫРУ ШӘКІРТАҚЫСЫН ТАБЫСТАДЫ
Бүгін, яғни 01.02.2021 ж. Әл-Фараби атындағы ҚазҰУ-дың Ғылым кеңесінің отырысында Түрксой кафедрасының 2-4 курс студенттеріне халықаралық «ТҮРКСОЙ» ұйымы атынан ынталандыру шәкіртақысын табыстау рәсімі өтті.
Студенттерді марапаттау рәсімінде түркі әлемінің бай мұрасын насихаттап, мемлекеттер арасындағы ынтымақтастықтың нығаюына қызмет етіп келе жатқан халықаралық «ТҮРКСОЙ» ұйымының бас хатшысы Дүйсен Қорабайұлы Қасейінов мырза сөз алып, ұйымының 2015 жылдан бері ҚазҰУ-дың сенімді серіктесі болып табылатындығын атап өтті. Сонымен қатар Түрксой кафедрасының студенттерін ынталандыру мақсатында жыл сайын тағайындайтын шәкіртақыны биылғы оқу жылында да үздік оқитын студенттерге жалпы сомасы 1 млн. теңге көлемінде ұсынып отырғандығын айтты.
Дүйсен Қорабайұлы «Өздеріңізге аян, 2020 жылы әл-Фараби мерейтойымен қатар, қазақ ойшылы, жаңа қазақ әдебиетінің негізін салған ұлы ақын Абай Құнанбайұлының 175 жылдық мерейтойы өтті. Бұл мерейтой Халықаралық ТҮРКСОЙ ұйымы тарапынан «Түркі әлеміндегі Абай жылы» деп жарияланып, Еуразия елдерінде, түбі бір түркі жұрттарында мерекеленді. Осы атаулы жылға арнап біздің ұйым Халықаралық Абай медалін шығарды. Бұл медаль ұлт мәдениетінің дамуына ерекше еңбек сіңірген тұлғаларға беріледі. Сіздердің алдарыңызда қазақ мәдениетінің үлкен жанашыры, университет ректоры Ғалымқайыр Мұтанұлын Халықаралық Абай медалімен марапаттауға рұқсат етіңіздер» - деп, Ғалымқайыр Мұтанұлының кеудесіне ақын атындағы медальді тақты.
Бүгінгі таңда Түркі халықтарының мәдениетін жақындастыру мен бай мұрасын сақтауда сүбелі үлес қосқаны және университетпен ұдайы байланыста болып, студенттерге қолдау танытқаны үшін ҚазҰУ ректоры Ғалымқайыр Мұтанұлы Мұтанов университет ұжымы атынан халықаралық ТҮРКСОЙ ұйымына алғыс білдіріп, Дүйсен Қорабайұлына әлемде тұңғыш рет жарық көрген Әл-Фараби энциклопедиясы мен ұлы ойшылдың нақыл сөздерін табыстады.
Шәкіртақы иегерлері атынан 4 курс студенті Әсел Изимова халықаралық «ТҮРКСОЙ» ұйымына шексіз ризашылық білдіріп, болашақта жақсы маман иесі болатындығына сенім білдірді.
#ТҮРКСОЙ #AlFarabiUniversity #TRCKazNU
