Bu ilin 8 ayında Azərbaycana 1 milyon 818 min turist gəlib. Bank əməliyyatları isə 97 faiz artaraq 703 milyon manatdan çox olub. Bu da ötən illə nisbətdə iki dəfə artım deməkdir. Mədəniyyət və turizm naziri Əbülfəs Qarayev Beynəlxalq Turizm Günü münasibətilə təşkil olanan brifinqdə belə dedi. Nazirin sözlərinə görə, son vaxtlar ölkədə turizmin inkişafı göz önündədir. Rəqəmlər heyrətdoğurucu olmasa belə, Azərbaycan turizminin keyfiyyətcə yeni müstəviyə qədəm qoymasından xəbər verir.
“Bu gün Bakının küçələrində, regionlarda gözümüzün önündə olan müxtəlif millətlərin nümayəndələrinin mövcudluğu ondan xəbər verir ki, real olaraq turist axınları sözün əsl mənasında turist axınlarıdır. Ona görə də buna sevinməmək olmaz, bunu da Azərbaycanın cəlbediciliyini, son zamanlar cənab prezidentin ölkəmizdə apardığı beynəlxalq və daxili siyasətin məntiqi nəticəsi kimi qəbul olunmalıdır”.
Ölkədə mehmanxana və otellərin göstərdiyi xidmətlərdən bəhs edən Əbülfəs Qarayev bildirdi ki, Azərbaycanda indi 563 otel fəaliyyət göstərir. Turizm sənayesində ümumilikdə 46 min insan çalışır. Nazirin sözlərinə görə, bu ilin 8 ayında xarici turistlər ölkədə 1 milyon 300 min manat vəsait xərcləyib. Yerli turistlərin 8 ayda xarici ölkələrdə xərclədiyi məbləğ isə 1 milyon 200 min manat olub. “Turizm haqqında” qanunun qəbulu ilə bağlı işlərin getdiyini deyən Əbülfəs Qarayev bildirdi ki, indi keyfiyyət kriteriyaları hazırlanır, həmçinin reyestr sisteminin hazırlanması üçün işlər görülür.
Qeyd edək ki, sentyabrın 27-si dünyada Beynəlxalq Turizm günü kimi qeyd olunur. Bu gün həmçinin Azərbaycanda turizm işçilərinin peşə bayramı elan edilib. Bu münasibətilə hazırlanan tədbirlər planına əsasən, kitabxanalar, mədəniyyət evləri, klublar və muzeylərdə "Açıq qapı günləri" keçirilir. Muzeylərə baş çəkənlər arasında məktəbli qrupları və xarici qonaqlar üstünlük təşkil edir.
Azərbaycan İstiqlal Muzeyinin şöbə müdiri Sədi Mirseyidli deyir ki, bu gün ərzində həm yerli, həm xarici vətəndaşlar, o cümlədən məktəblilər muzeyin qonağı olub.
Qeyd edək ki, sentyabrın 25-dən 29-dək ölkədə “Turizm həftəsi” elan olunub. Məqsəd Azərbaycanın milli sərvətlərinin, tarixi abidələrinin, xalçaçılıq incilərinin gənclər və xarici vətəndaşlar arasında təbliği və onların bu sahədə məlumatlandırılmasıdır.
