«Ырыс алды – ынтымақ» дейтін халықпыз. Бірлесіп жасаған шаруада қашанда береке болады. Осы қанатты қағиданы қазық етіп алған Ауыл шаруашылығы министрлігі Қарағанды облысының Нұра ауданында кооператив құруды қолға алды. Қанатқақты жоба бірден 12 ауылда жүзеге аспақ.
Мұнда сүт қабылдау пункттері ашылып, ел қысы-жазы жинаған сүт-қаймағын қымбат бағаға өткізеді. Бұл – нәпақасын төрт түліктен тауып отырған ауылдағы ағайынға үлкен көмек. Тұрғындар бұдан ештеңе жоғалтпайды.
Нұржан Төлеуов – Ақмешіт ауылында құрылған кооперативтің төрағасы. Іскер жігітті жергілікті халық сайлапты. Әзірге жаңа ұжымның құрамына 39 отбасы енген. «Қолдарында азын-аулақ малы бар ауыл тұрғындары үшін бұл табыс табудың таптырмас жолы», – дейді ол.
Нұржан Төлеуов, кооператив төрағасы
- Сүт өнімін жақсы тапсырса, оларға да табыс түседі. Күнделікті өздерінің ақшасы болады. Бұл кооперативтің арқасында арзан бағамен жем-шөбін дайындап алады. Мемлекеттік бағдарламаны халық бірден қолдады.
Бұған дейін қырдағы жұрттың қысы-жазы жинаған қорын сүт зауытынан келіп, арзан бағаға алып кететін. Енді оған жол берілмейді. Тұрғындар сүттің әр литрін кооперативке жыл бойы 80 теңгеден тапсырып отырмақ. Ақшасы әр адамның есепшотына аударылады. Қазір барлық құжат рәсімделген. Ендігі жұмыс – сүт қабылдайтын пункттер ашу.
Ардақ Асылханұлы, тілші
-Тура 2 айдан кейін дәл осы жерде сүт қабылдайтын арнайы орын пайда болады. Қазір Ақмешіт ауылында барлығы 500-ге жуық сауынды сиыр бар. Кооператив төрағасы: «Тәулігіне 3 тоннаға жуық сүт жинаймыз», – деп жоспарлап отыр.
Жиналған сүт мынадай шағын контейнерлерде сақталады. Оның сапасын қадағалап отыратын арнайы мамандар да болады. Бұған қоса кооператив құрамындағы ағайынға сауын аппараттары алынады. Ал оның құны мемлекеттен берілетін көмек есебінен өтеледі.
Мешітбай Жұманов, Нұра ауданы әкімінің орынбасары
-Әр тапсырған сүттің литріне 10 теңгеден субсидия төлейді. Ол субсидия кооперативтің есепшотына келіп түседі. Сол субсидиядан өзіне еңбекақы алады. Сонымен қатар әр ай алынған қондырғының құнын төлейді.
Бірігудің тағы бір пайдасы жеңілдетілген несиеге қол жеткізуге болады. Сөйтіп шаруашылықты дамытуға мүмкіндік туады. Мамандардың жоспарлауынша Нұра ауданының 12 ауылында 10 мыңға жуық сиырдан жылына 5 мың тоннаға жуық сүт жиналады.
Авторлары: Ардақ Асылханұлы, Сайлау Игіліков, Әсет Асайынов
![](https://s2.save4k.ru/pic/jkwQjsDLH20/maxresdefault.jpg)