Биыл күзде жол ережесін бұзғаны үшін көлік жүргізушілеріне тағайындалатын әкімшілік жаза қатаңдайды. Сәйкес заңға Президент Қасым-Жомарт Тоқаев қол қойды. Ақтөбелік тәртіп сақшылары соңғы кезде қала жолдарында жол-көлік оқиғаларының жиілеп кеткенін айтып, дабыл қағуда. Жыл басынан бері 13 қала тұрғыны көлік апатының құрбаны болған. Қалада жол-көлік оқиғасы көбейіп барады. Жыл басынан бері тіркелген 135 апаттың салдарынан 13 адам қайтыс болып, 152-сі түрлі дене жарақатын алған. Осыған орай қалалық полиция басқармасы азаматтарды жол қозғалысы ережесін қатаң сақтауға шақырды. Атап өтейік, дүйсенбіде мемлекет басшысы Қасым-Жомарт Тоқаев ҚР Әкімшілік кодексіне өзгерістер енгізу туралы заңға қол қойды. Оған сәйкес, биыл қыркүйек айынан бастап көлік жүргізушілеріне жол ережелерін сақтамағаны үшін жаза қатаңдатылады. Атап айтсақ, енді мемлекеттік нөмірсіз көлік тізгіндегендер жүргізуші куәлігінен айырылады. Оған қоса жалған нөмір жапсырып алғандар да 5 тәулікке қамалып, 1 жылға көлік жүргізу құқығынан айырылуы мүмкін. Сондай-ақ, полиция қызметкерінің көлікті тоқтату жөніндегі талабынан жалтарғандар 40 АЕК-ке дейін айыппұл төлейді. Бір жыл ішінде тәртіп бұзушылық қайталанса, жүргізуші 5 күнге темір торға қамалып, жүргізуші куәлігінен 1 жылға айырылады. Ақтөбелік көлік жүргізушілері аталған өзгерістермен келісеміз дейді. Себебі, соңғы уақытта қала жолдарында тәртіпсіздіктер көбейіп кетті, деген пікірде олар. Атап өтейік, ҚР Әкімшілік кодексіне өзгерістер енгізу туралы заң жобасы 2 айдан кейін күшіне енеді. Яғни, 11 қыркүйектен бастап тәртіп бұзған көлік жүргізушілерінің жазасы жаңа заң бойынша тағайындалатын болады.
Сайт телеканала [ Ссылка ]
Twitter [ Ссылка ]
Вконтакте [ Ссылка ]
