Алматыда осыдан сегіз ай бұрын ауруханадан шығып кетіп, кейін мәйіті көшеден табылған Айдос Мұсаевтың қайтыс болғанын туыстары осы уақытқа дейін білмей келген. Ең сұмдығы, полицейлер марқұмның кім екенін таныса да, ол туралы жақындарына хабарламастан мәйітті белгісіздердің бейітіне көміп тастаған. Ал Айдостың туыстары жоғалған бауырымыздың өлімін бүгінге дейін жасырған полицейлер жазалансын дейді.
Айдостың әпкесі Қаракөз Мұсаева бауырымды өз қолыммен жер қойнына тапсырып, бір уыс топырақ та сала алмадым деп жылайды. Көңілін шер басқан әйел аты-жөні жазылмаған, белгісіздер бейітіндегі мына бір жерде жақынының жерленгеніне сенбейді.
Қаракөздің айтуынша, Айдос 2 наурыз күні жедел жәрдеммен Іле ауданындағы ауруханаға жеткізілген. Дәрігерлер сол күні кешке науқастың ауруханадан шығып кеткенін айтқан еді. Тек 4-5 күннен кейін азаматтың мәйітін полицейлер Алматыдағы көшелердің бірінен тапқан. Тіпті мәйітханаға апарып, марқұмның жеке басын да анықтаған дейді марқұмның жақындары. Ең сорақысы, Айдосты тани тұра, оның қайтыс болғаны жайлы хабарды бізге хабарламай көміп тастаған деп ашулы. Тіпті бауырының ішкі құрылысынан қан кетіп көз жұмғаны да жақында белгілі болған. Ал 8 ай бұрын із-түссіз жоғалған атпалдай азамат кешегі күнге дейін әне-міне қайта оралады деген үмітпен өмір сүрдік дейді Айдостың әпкесі.
ҚАРАКӨЗ МҰСАЕВА, Айдостың әпкесі:
– Мәйітханада 18 күн жатқан. 24 наурызда алып келіп осы жерге жерлеген. Ешкімнің рұқсатынсыз. Біз бұл жағдайдан мүлде бейхабар болдық. 8 ай бойы күттік. Үмітпен оралар деп. Бір жерде жұмыс істеп жүр деп.
Айдостың ауруханадан неліктен қашып шыққаны, дәл сол уақытта дәрігерлердің полицейлерге неге хабар бермегені марқұмның жақындарына жұмбақ. Қаракөз Мұсаева бауырымның көз жұмғанын қайғылы жағдайлар бюросы анықтамағанда, әлі күнге одан бейхабар жүрер едік дейді. Ал өз қолдарымен арулап жерлемеген соң дәл мына қабірде Айдостың мәйіті жатыр дегенге де күдікпен қарайды.
ҚАРАКӨЗ МҰСАЕВА, Айдостың әпкесі:
– Жатқан әруаққа тиіспеңіздер, сүйегіне тиіспеңіздер деп үзілді-кесілді бас тартып тұр. Бұл маған күдік тудырып тұр. Бұл менің бауырым ба, жоқ па?
Қазір Қаракөз өз бауырының қабірі делінген жерді қазу үшін полицейлерден рұқсат сұрап табаны тозып жүр. Сондай-ақ, 8 ай бұрын мәйітті тауып алса да, оны туыстарына хабарламай белгісіздердің бейітіне жерлей салған құзырлы орган қызметкерлері кешірім сұрап, жазадан құтылып кетпесін деп талап етеді. Ал бұған байланысты Алматының полиция департаментіндегілер алдағы күндері ақпарат береміз деді.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
#жұмбақөлім #полиция #қылмыс
Ещё видео!