البارحه مع هجعه العربان بالثلث الاخير
قمت اتنقى من بنات الفكر والطاري طرا
يوم انتخى بي صاحبي ونا احمد المولى بخير
ماني مقصر في لزومه لو جرا لي ماجرا
ولاني مدور للعذر والله من دون الامير
ابن سويلم صاحبي لجله عسفت الضمرا
حثيت له سابق فكر من قلب واحساس وضمير
واركضتها مع خيرة بكار القصيد الندرا
من عقب مارسنتها نوختها وانا بصير
ادرا عليها والهقاوي قدم ماترجع ورا
شديت حبل بطانها وتقبلت تبغى المسير
طربه وعجله كنها ذيبٍ نوا علم وسرا
راحت على ناموسها عجله ولا معها خشير
تحت مساير هاجسي وعيون خلق الله ترا
ماجفلوها بالبواري والمنادا والصفير
ابعد على الطماع بعد امن الثريا لثرا
نصيتها حفل الكرام اللي تفك المستجير
اهل هلا يامرحبا واهل البيوت ام الذرا
واهل الكرم واهل الشداد ومروية حد الشطير
اللي لهم تاريخ مايجهل ولا هو ينكرا
واهل البيوت العامره والعز والقدر الكبير
فوايده والف ونعم والف ونعم تقطر سرا
الاوله من قسمهم ماهم هل العلم الاخير
خوه وطيب ومرجله وحزام وسناد وذرا
حصلتها بالفايدي و بحضره الجمع الغفير
اقولها واللي درا بيعلم اللي مادرا
وانا وقفت بلازم الصاحب ولاني مستخير
لاجل سعد راع الوفى غنيت الابيات اجهرا
هلا هلا يامرحبا باسمه تردد من عصير
هلا هلا باهل الوفى اللي بالمواقيف اخشرا
يامرحبا والبن يدرج والمباخر تستدير
بالعود الازرق والشحم من دونكم مايقصرا
ترحيبة بالضيف والصاحب مثل نفح العبير
ترحيبةٍ بمشرفين الحفل من مدن وقرا
اقولها باسم سعد وانا احمد المولى بخير
ولا ني مجنب عن لزومه لو جرالي ماجرا
كلمات الشاعر : عبدالرحمن العنيني ( الشمالي )
