Бірер сағат бұрын Қарағанды облысындағы «Саран» шахтасында төтенше жағдай болып, салдарынан 3 адам қаза тапты. Тағы 5-і ауыр жарақатпен ауруханаға жеткізілген. Бұл туралы «АрселорМиттал Теміртау» компаниясының баспасөз қызметі хабарлады.

Қазір арнайы комиссия құрылып, апаттың себеп-салдары анықталуда. Әзірге кеншілердің неден зардап шеккені белгісіз. Оны кәсіби мамандар тек тексеру жұмыстарынан соң жарияламақ.

Ал облыстық денсаулық сақтау басқармасы мамандарының хабарлауынша, жараланғандар Мақажанов атындағы клиникаға жеткізілген. Біреуі ауыр халде, қалғандарының жағдайлары қалыпты, жарақаттары орташа. Бір кеншінің бас сүйегі сынған, оған қазір операция жасалып жатыр.

«АрселорМиттал Теміртау» компаниясына тиесілі «Саран» шахтасы директорының хабарлауынша, барлығы 12 кенші жұмыстарын аяқтап, шахтадан шығып келе жатқанда, трос үзіліп кеткен. Жұмысшылардың ең жасы 20-да, ең үлкені 50-де. Қалғандары аман-есен жер бетіне шығарылды.

свернуть