22 İyul - Azərbaycanda milli mətbuatın yaranması günüdür - Baku TV

146 il öncə - 1875-ci il iyulun 22-də dövrünün maarifçilik hərəkatının görkəmli nümayəndələrindən olan Həsən bəy Zərdabinin “Əkinçi” qəzetinin nəşrə başlaması ilə Azərbaycan milli mətbuatının əsası qoyuldu.

Jurnalistikamızın bayraqdarına çevrilən “Əkinçi” qəzeti ilə Azərbaycan mətbuat tarixində yeni era başladı. Sonrakı illərdə nəşr edilən “Ziya”, “Kəşkül”, “Şərqi-rus”, “İrşad”, “Molla Nəsrəddin” kimi qəzet və jurnallar “Əkinçi”nin ənənələrini davam etdirdi.

Bu mətbuat orqanının əsas hədəfi xalqı maarifləndirmək, cəhalətə, haqsızlığa qarşı mübarizə aparmaq idi. Azərbaycan Xalq Cümhuriyyəti dövründə azad mətbuatın, eləcə də hadisələrə yeni baxışın təməli qoyuldu. 146 yaşlı mətbuatın 70 ili kommunist diktaturası dövrü ilə bağlıdır. Həmin dövrdə mövcud problemləri daha çox sətiraltı mənada yazan Azərbaycan mətbuatı, SSRİ-nin yürütdüyü siyasətin, ideologiyanın əsarətində idi desək, yanılmarıq.

1980-ci illərin II yarısından başlayaraq Azərbaycan mətbuatı yeni inkişaf mərhələsinə qədəm qoydu. Bu yeni inkişaf dövrünün təməlini qoyan ulu öndər Heydər Əliyev hər zaman mətbuatın cəmiyyətə təsir gücünü yüksək qiymətləndirib, mətbuat və söz azadlığı, kütləvi informasiya vasitələrinin maddi-texniki bazasının möhkəmləndirilməsi istiqamətində ardıcıl tədbirlər həyata keçirib. Müstəqillik dövründə Azərbaycan mətbuatı ilə bağlı ilk fərmanı da Heydər Əliyev imzalayıb.

1999-cu ildə “Kütləvi İnformasiya Vasitələri haqqında” beynəlxalq tələblərə cavab verən qanun qəbul edilib. 1998-ci ilin avqustunda senzuranın ləğvi isə Azərbaycanda mətbuatın inkişafına ciddi təkan verib. Bu gün ölkədə söz və mətbuat azadlığına, Kütləvi İnformasiya Vasitələrinə ən yüksək səviyyədə diqqət və qayğı var.

2020-ci il sentyabrın 27-də başladılan 44 günlük Vətən müharibəsində Azərbaycan döyüş meydanında olduğu kimi, informasiya savaşında da qələbə qazandı. Kütləvi İnformasiya Vasitələrinin nümayindələri əsl fədakarlıq göstərərək həm ön xətdə vuruşdular, həm də canları bahasına olsa belə reportajları ilə dünyaya haqq səsimizi çatdırdılar.

Hər bir jurnalistə peşə fəaliyyətində obyektiv və qərəzsiz olmasını arzulayırıq. Qələm qılıncdan itidir, qələminiz iti olsun!



Kanalın əsas məqsədi dünyada və ölkədə baş verən ən vacib və maraqlı xəbərləri azərbaycan və rus dillərində geniş auditoriyaya çatdırmaqdır.

Baku.Tv ölkədə və dünyada baş verən ən aktual və maraqlı hadisələr barədə operativ videosujetlər hazırlayaraq auditoriyaya təqdim edir.

Facebookda səhifəmiz:
[ Ссылка ]
[ Ссылка ]
[ Ссылка ]

Kanalda bütün müəllif hüquqları qorunur.

#BakuTv #Azerbaycan #trend

свернуть