Тарихи естеліктен үзінді...
1926 жылдан бері тойланбаған наурыз тойын Өзбекәлі Жәнібеков жаңғыртып қазақ еліне сыйлады.
Сөйтіп, Еңбек ауылында наурыз тойын өткізбекші болдық.
Мен сол кезде бөлімше басқарушысы едім .Бірақ, наурыз тойын көрмеген , білмейтін кезеңнің жастары едік.
Сол кездегі дайындалу , өткізу ауыртпалығы мектепке түсті.
Мектептің сол кездегі директоры Төкең ұстазымыз өз қолымен сценарийді жасап еді.
Бір ай дайындалып "Қос қарағай" деген ауыл басында өткізіп едік.
Төлеген Рақымжанұлы кіріспе сөз сөйлеп , ауылдың ең үлкені Дәуіт ата бата берген еді.
Ауылдастарымыз атсалысқан мұғалімдер,бөлімше мамандары , жастар.
Камалиев Серікжан көшу көрінісін өткізуде ,Райгүл Сахариева қыз қууды өткізген.
Ол 1989 ж. сәуірде болған.
Сол кездегі бөлімше басқарған Сақпанов Тоқтархан ағаның естелігі...
НАУРЫЗ ЖЫРЫ
(Еңбек ауылындағы ең алғашқы 1989 жылғы наурыз тойын тойлағандағы оқылған өлең)
Алпыс үш жыл өткіздік қапыда біз
Естіп қана наурыздың атын аңыз.
Наурыз көже пісіріп наурыз күні
Дәм татуға түгелдей шақырамыз.
Мереке деп ауылға жар саламыз,
Меймандарды құрметпен қарсы аламыз.
Еңбек-Еңбек болғалы
айта жүрсін
Өткізейік наурызды баршаға біз.
Бүгінгі өнер-Наурызды айта білу,
Бұл мейрамды әкелген —Қайта құру.
Мекені емес Еңбегім бір атаның
Әр қиырдан жиылған тайпалы ру.
Қожамбет бар наурызда Бура да бар,
Самай қызыл картобын турап алар.
Ортамызда жүр бүгін Қожанасыр
Алдар көсе дейтұғын қуға барар.
Зергерлікпен үлгісін дара тастар
Шимойын бар, Ителі, Қарақастар.
Шеруші бар, Уақ пен Сарғалдақтар—
Шежірені біле ме ана жастар?!
Талай ру тайпаның әулеті бар,
Бәйгісісі, Бәйтені, дәулеті бар.
Құда-жекжат, нағашы, жиен туыс
Шоңмұрынның салтанат сәулеті бар.
Өлең буған ақынның арқасы бар,
Наурыз көже —ашымал арпасы бар.
Дәм татуға бәріңді шақырамыз
Жылқы сойдық:
қазысы, қартасы бар.
Жөн, ендеше, билейік, әндетейік,
Наурыз жырын әйгілеп, мәнді етейік!
Осы жерге аман-сау, таза келдік,
Қайтқанда да тазарып, сау кетейік!!!
