#inja_live #jonli_efir
БАҲОРНИНГ ТАНИШЛАРИ
(туркум шеърлар)
1
Боғлар.
Жим ҳўрсиниб оғир,тин олар,
ўша еру осмон...олтита ёқ бор.
ҳамон ҳаёлимда яшил нолалар,
ҳануз ўйларимда зангори оҳ бор.
сассиз оғриқларга даво бўлмас май,
хотира эски бир унутилган жом.
баҳорда мактублар битасан тинмай,
«бизни ташлаб кетган кузларга салом...»
қишлардан қочасан:
"юракни беркит,
кўзларингни юмгин,қўлларинг яшир"
ҳануз фикрларинг зангори эркин,
ҳамон ҳаёлларинг яшил,о,яшил.
энди дардни қўйгин,
умидлар ахтар,
озғин вужудингни соғинч ёқаркан,
боғларга гапириб фақат бахт ҳақда,
ана ўрикларнинг сочи оқарган...
2
Соғинчли қанотин базўр кўтариб,
учиб борар енгил,учиб борар шаън,
қушлар қайтаётир уйига, ғариб,
мен эса кучсизман
мен енгиламан...
далалар майсулик либосин кийган
ҳайр-хўш ёғдирар кузги дарахтлар,
кўзларим ёш тўкмас,кўзларим куйган,
соғинчга айланган бизларнинг бахтлар.
менинг ҳаёлларим,менинг ўйларим
қишги ҳуружларга бўлаётир ғарқ.
фақат битта қуш бор...
тинмай куйлади,
мени тарк этмади,тарк этмади,тарк...
воҳ,қушим қовурғам қафасин синдир,
куйла,куйлайвергин тўхтама тун-кун.
дунёда ўлиб ҳам яшаш мумкиндир,
дунёда яшамай ўлмоқ ҳам мумкин...
3
Сенинг кузинг,
менинг ёзларим,
ва уларнинг қишлари кўпдир.
фаслларга айланган соғинч,
дард емоққа бахтимиз йўқдир.
Сенинг ҳазон,
менинг сойларим,
ва уларнинг аёзлари мўл.
фаслларга айланган ғусса,
юрагимга топилмаган йўл.
фаслларга айланган ҳаёт
ҳаёлимда жонланар минг-минг.
қара,қара яхшилаб қара
баҳоримиз йўқдир
ҳеч
биримизнинг...
2018
Раҳмат БОБОЖОН
![](https://i.ytimg.com/vi/lveDYFwCvqQ/mqdefault.jpg)