Владыко Вседержителю, Святый Царю, наказуяй и не умерщвляяй, утверждаяй низпадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имя рек) немощствующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть и всякую немощь таящуюся, буди врач раба Твоего (имя рек), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою. Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.
Боже сильный, милостию строяй вся на спасение роду человеческому, посети раба Своего сего (имя), нарицающа имя Христа Твоего, исцели его от всякаго недуга плотскаго: и отпусти грех и греховныя соблазны, и всяку напасть, и всяко нашествие неприязненно далече сотвори от раба Твоего. И воздвигни от одра греховнаго, и устрой его во святую Твою Церковь здрава душею и телом, и делы добрыми славящаго со всеми людьми имя Христа Твоего, яко Тебе славу возсылаем, со Безначальным Ти Сыном и со Святым Духом, ныне и присно и во веки веков. Аминь.
О Премилосердый Боже, Отче, Сыне и Святый Душе, в нераздельней Троице покланяемый и славимый, призри благоутробно на раба Твоего (имя рек), болезнию одержимаго; отпусти ему вся согрешения его; подаждь ему исцеление от болезни; возврати ему здравие и силы телесныя; подаждь ему долгоденственное и благоденственное житие, мирная Твоя и премирная благая, во еже ему вкупе с нами приносити благодарный мольбы Тебе, всещедрому Богу и Создателю нашему.
Пресвятая Богородице, умоли Сына Твоего и Бога моего, об исцелении раба Божия (имя рек).
Вси святии и ангели Господни, молите Бога о болящем рабе Его (имя рек). Аминь.
#Православие
#Молитваоболящем
#Молитваотболезней
#Здоровье
#МолитваБогу
#МолитваГосподуБогу
#МолитваБогородице
#СвятойЗакон
#Молитва
