Shkrimtari më i njohur shqiptar, Ismail Kadare është shuar në moshën 88-vjeçare. Kadare u gjet i pajetë nga familjarët e tij në banesë dhe u dërgua në Qendrën Spitalore Universitare Nënë Tereza. Mëngjesin e sotëm personelit shëndetësor nuk mbeti asgjë tjetër veçse të konfirmonin vdekjen e Ismail Kadaresë për shkak të një arresti kardiak respirator.
Ismail Kadare lindi më 28 Janar 1936 në Gjirokastër, aty ku përfundoi edhe arsimin e mesëm. Më 1958-ën mbaroi degën e Gjuhës e të Letërsisë në Universitetin e Tiranës. Më pas shkoi me studime në Moskë për dy vjet në Institutin e Letërsisë Botërore "Maksim Gorki".
Ai fitoi njohje ndërkombëtare që kur romani i tij “Gjenerali i Ushtrisë së Vdekur” u botua në vitin 1963, kur Shqipëria qeverisej nga qeveria komuniste e diktatorit Enver Hoxha. Libri u përkthye në 33 gjuhë të botës dhe i dha autorit njohje ndërkombëtare. Romani u vlerësua nga gazeta e njohur e Parisit, Le Monde si një ndër 100 librat e shekullit XX.
Përpara se në Shqipëri të vendosej pluralizmi politik, pas protestave të studentëve në dhjetor 1990, oti Kadare udhëtoi me avion drejt Francës, ku kërkoi azil politik. Ai jetoi në Paris, ndërsa vitet e fundit u rikthye në Tiranë. Më 17 tetor 2023, shkrimtarit të madh shqiptar iu dha titulli i Oficerit të Lartë të Legjionit të Nderit, nga Presidenti francez Emmanuel Macron.
Shpesh emri i tij u përfol për si një ndër konkurentët për marrjen e Çmimit Nobel për Letërsinë. Në vitin 2005 fitoi Çmimin Ndërkombëtar “Booker” ndërkohë ishte kandidat pretendent edhe për vitin 2024 me librin “Kur sunduesit grinden” i cili u vlerësua si një “meditim letrar magjepsës mbi Rusinë Sovjetike, autoritarizmin, strukturat e pushtetit në një periudhë shkrimtarësh të mëdhenj”.
#ismailkadare
#shqiperi #albania
