Давлатимиз раҳбарининг Фарғона вилоятига ташрифи давомида берилган кўрсатмалар ижроси доирасида тузилган Республика ишчи гуруҳи ташаббуси билан ушбу болалар боғчасида мукаммал таъмирлаш ишлари амалга оширилди.
Қисқа вақт ичида мактабгача таълим ташкилоти фасади, томи, гуруҳлар, болалар майдончалари ва санитария тизимлари мукаммал таъмирланди. Янги футбол майдони ва болалар шаҳарчаси барпо этилди.
Тантанали маросимда Қўқон шаҳар ҳокими Маруфжон Усмонов, қурилиш ташкилоти масъуллари, болалар боғчаси педагогик жамоаси, болажонлар ва уларнинг ота-оналари иштирок этдилар.
Маруфжон Усмонов мамлакатимизда ўсиб келаётган ёш авлодни ҳар томонлама баркамол инсон этиб тарбиялашга қаратилаётган эътибор, шаҳримиздаги таълим муассасаларида амалга оширилган улкан бунёдкорлик ишлари хусусида маълумот берди.
Мукаммал таъмирлаш ишларига ҳомийлик қилган Божхона қўмитаси мутасаддилари ҳамда ишларни қисқа вақт ичида сифатли қилиб бажарган қурилиш ташкилоти раҳбарларига Ташаккурномалар ва эсдалик совғалари топширилди.
