Вифлеем. Храм Рождества Христова.
Рождество Христово
7 января
Тропарь предпразднства, глас 4
Готовися, Вифлееме,/ отверзися всем, Едеме,/ красуйся, Евфрафо,/ яко древо живота в вертепе процвете от Девы:/ рай бо Оноя чрево явися мысленный,/ в немже Божественный сад,/ от негоже ядше, живи будем,/ не якоже Адам умрем.// Христос раждается прежде падший возставити образ.
Кондак предпразднства, глас 3
Дева днесь превечное Слово/ в вертепе грядет родити неизреченно:/ ликуй, вселенная, услышавши,/ прослави со Ангелы и пастырьми/ хотящаго явитися// Отроча Младо, Превечнаго Бога.
Тропарь навечерия Рождества Христова, глас 4
Написовашеся иногда со старцем Иосифом, / яко от семене Давидова, в Вифлееме Мариам, / чревоносящи безсеменное Рождение. / Наста же время рождества, / и место ни единоже бе обиталищу, / но, якоже красная палата, / вертеп Царице показашеся. / Христос раждается / прежде падший воскресити образ.
Кондак навечерия Рождества Христова, глас 3
Дева днесь превечное Слово/ в вертепе грядет родити неизреченно:/ ликуй, вселенная, услышавши,/ прослави со Ангелы и пастырьми/ хотящаго явитися// Отроча Младо, Превечнаго Бога.
Тропáрь Рождества Христова, глас 4
Рождествó Твоé, Христé Бóже наш,/ возсия́ ми́рови свет рáзума,/ в нем бо звездáм служáщии/ звездóю учáхуся/ Тебé клáнятися, Сóлнцу Прáвды,/ и Тебé вéдети с высоты́ Востóка.// Гóсподи, слáва Тебé!
Кондáк Рождества Христова, глас 3
Дéва днесь Пресу́щественнаго раждáет,/ и земля́ вертéп Непристу́пному принóсит,/ Áнгели с пáстырьми славослóвят,/ волсви́ же со звездóю путешéствуют,/ нас бо рáди роди́ся// Отрочá Млáдо, Превéчный Бог.
Величáние
Величáем Тя,/ Живодáвче Христé,/ нас рáди ны́не плóтию рóждшагося/ от Безневéстныя// и Пречи́стыя Дéвы Мари́и.
Задостóйник, глас 1
Величáй, душé моя,// Честнéйшую и Слáвнейшую Гóрних вóинств, Дéву Пречи́стую, Богорóдицу.
Люби́ти у́бо нам я́ко безбéдное стрáхом/ удóбее молчáние,/ любóвию же, Дéво,/ пéсни ткáти, спротяжéнно сложéнныя, неудóбно есть,// но и, Мáти, си́лу, ели́ко есть произволéние, даждь.
![](https://s2.save4k.ru/pic/nGDiN1mri2A/maxresdefault.jpg)