Ассалаумағалейкум көрермен
Ершат ақынды жылатқандар кім? Әнші Нұрболат Абдуллин кімдерді ренжітіп жүр? Құмырсқадай қаптаған эстрада жұлдыздарының гонорары қанша? Олардың мәдениетке үлесі қаншалықты тиіп жатыр? Қазақ қоғамында қайыршының күйін кешкен ақындар туралы не дейміз? Бұл туралы шымбайға батар шындықты Диван батыр арнасы айтатын болады!
Көрермендер 10 секундымызды қиып видеоға лайк басып, арнаға тіркеліп қасындағы кішкентей қоңыраушаны түрте кетіңіздер! Кеттік ендеше
Менің қаламақым 20 мың теңге болды деп көзіне жас алған жалынды ақын Ершат Қайболдин көпшіліктің жүрегін елжіретті. Тәуелсіз журналист Нұрсейіт Жылқышыбайдың Уақыт көрсетеді бағдарламасында қонақ болған Ершат ақын еңбегінің лайықты бағаға ие болмағанына тоқталды. Ол қазіргі таңда сахнаның төрінде өнер көрсетіп жүрген жұлдызсымақтардың жұлдызын жағуға мейлінше ықпал еткен. Мәселен, өз сөзінде ол: Нұрболат Абдулиннің хит болған Сен қорқақсың әнінің сөзін жазғанын, одан тек қаламақыға 20 мың теңге алғанын тілге тиек етіп, артынан көз жасына ерік берді. Тұрмыстың тапшылығы, сары бала, қара қазанның қамы талантты ақынның жігерін құм қылғаны да оның өксікке толы өңеші мен жасқа толған жанарынан ап айқын сезіледі. Жалпы, ақын деген елдің еркесі, қажет болған жағдайда серкесі бола білетін жан. Қазақ қоғамында төрден төмен орын алмаған ақынның бүгінгі дәрежесі тобықтан төмен түскені ащы болса да шындық. Кезінде Мұқағали да, Қасым Аманжолов та, Шәмші де лайықты түрде бағаланған жоқ. Олар рухани бай болғанымен, тұрмысы теңселген, кедейліктің күйінде өмір сүрді. Кедей, аш жалаңаш қалыптарында өмірден өтті. Ал, бүгінгі күнге не жорық? Әншілердің еңбекақысын азайтайық демеймін. Тек әншіні әнші қып жүрген, Ершат сынды елдің еркелерін де мүмкіндігінше қолдау керек.
Нұрболат үшін 20 мың түгілі, 200 мың теңге не тәйірі? Мәліметтерге сүйенсек Нұрболат Абдуллиннің бір тойдан табатын табысы 6 мың АҚШ долларын құраған. Әншіні қуанышыңызға шақыратын болсаңыз, қонақ үй мен ұшақ билетін алуға да дайын болыңыз. "Бізде гонорар 6 мың доллар. Жол билеті мен қонақ үйге екі адамға орын аласыздар. Егер алдын-ала белгілі бір сомасын төлеп қоямыз десеңіздер, жеңілдікпен 2 млн теңгеге барады", - дейді Нұрболат Абдуллиннің көмекшісі. Міне, масқара! Одан да бөлек шегірткелердің... ой шегіртке деппін ғой әншілердің гонорарына көз жүгіртейік. Бүркіт пен Аишаның тойдағы гонорары былтырғы жылмен салыстырғанда өзгеріссіз қалған. Жұлдызды жұпты өз қуанышыңызда көргіңіз келсе, 7 мың АҚШ доллар төлеуге дайын болыңыз. "7 мың доллар. Осы соманың ішінде жолы, қонақ үйі де бар. 20 минуттан екі рет шығамыз", - деді әнші. Төреғали Төреәлі - 8 мың АҚШ долларына тойда ән айтуға дайын. "Алматы қаласында бағамыз 7 мың доллар. Ал басқа қалаларға 8 мың доллар. Бір аптаның ішінде гонорарды төлесеңіздер, үш адамға билетті өзіміз аламыз. Сонда сіздер тек қонақ үймен қамтамасыз етесіздер. Ең азы - 8 ән айтамыз. Ал егер төлем бір аптаның ішінде орындалмаса, үш адамға ұшақ билетін өздеріңіз аласыздар", - дейді Төреғали Төреәлінің көмекшісі. Қайрат Нұртас - 9 мың АҚШ доллары Мұнан бөлек әнші мен көмекшісінің билеттері, қонақ үйі де сіздің қалтаңыздан төленеді. Ал, бір кездері Ершат Қайболдинды сахнада әбден мазақ қылған Тұрсынбек Қабатовқа той басқартқыңыз келсе, 15 мың АҚШ долларын төлеуіңіз керек. "15 мың доллар. Тек жүргізуі, ұшақ билеттері, тамағы мен қонақ үйі осы соманың ішінде", - дейді әзілкештің көмекшісі. Недеген сұмдық! Сонда осы майшелпек пен жіліктің майлы жерін асағыштар, Ершат сынды ақиық ақынға келгенде не үшін сүйек қана лақтыруы керек. Бұл нағыз жұмыртқадан жүн қырқу болмай ма?
Тақырыпқа тұздық. Қазіргі таңда «Ән де, әнші де көп бола берсін, уақыт өте келе іріктеліп, ең үздіктері ғана қалады» деген тұжырым үстемдік құра бастады. Және мұндай пікірді белгілі өнер иелерінің айтуы сансыз ойларға жетелейді. Сонда өңшең ортаңқол, тіпті түкке тұрғысыз туындылар мен орындаушылар (әншілер емес) арасынан екшеліп, жөні түзу біреуі қалам дегенше тыңдарманның талғамы төмендеп, музыкалық өресінің дүмбілез бола беретіні неге қаперге алынбайды? Ал байыптай қарағанда мұндай жауапсыздықтың салдары ата-бабаларымыздың ғасырлардан бері келе жатқан рухани-мәдени желісіне балта шабылып, тұнығының лайлануына әкеліп соқтыруда. Нәтижесінде, бесіктен белі шықпаған балғындар көзін тырнап ашқаннан «тобырлық мәдениет» өнімдерімен ауыздануда. Жә, бұл туралы келесі видеоларымызда толық қамтып, халықты кенеше сорған әртіс, әнші, бишікештердің былығын әшкерелейтін боламыз.
Мәтінді оқыған Қуат Ахметжан
Жазған Бағжан Бақбергенұлы
Сіз үшін Диван батыр арнасы
![](https://i.ytimg.com/vi/nHWZmShGIy0/mqdefault.jpg)