Абон нæ республикæйы мидхъуыддæгты министрады раз арæзт æрцыд митинг. Адæм хъаст кæнынмæ цæуыл æрбацыдысты, уыцы хъуыддаг ног нæу. Ныхас цæуы, кæддæр Марковы уынджы цы зындгонд арæзтад цыд, уый тыххæй. Арæзтадон компани цы адæмы асайдта, уыдон сæ бартыл тох кæнынц. Æртын азы рацыд, фæлæ адæм сæ фатертæ нæма райстой. Нæ уацхæсджытæ хабармæ лæмбынæг æркастысты.
50 адæймагæй фылдæр райсомæй мидхъуыддæгты министрады бастыхаймæ æртымбыл сты. Иу æмæ дыууæ хатты нæ. Æнæхæдзарæй баззадысты æмæ 30 азы фæстæмæ се `хца агурынц. Кæнæ та сæ хæдзæрттæ. Сайды фесты 200 адæймагæй фылдæр. Фатертæ хъуамæ райстаиккой, Марковы номыл уынджы хæдзары бындурæн цы егъау дзыхъхъ скъахтой. уым. Хъуамæ дзы рагæй фæзындаид. Бындур ын сæвæрдтой æмæ йæ афтæмæй ныууагътой.
Цæрджыты ныхæстæм гæсгæ, хæдзар аразыны хъуыддаг иу къухæй иннæмæ фæрахау-бахау кодта. Фыццаг куыстытæн дзуапп лæвæрдта кооператив, Сбербанк æмæ горæты администрациимæ иумæ. Стæй 1996 азы куыстуат фæкъуыввитт ис. 2013 азы та арæзтадон куыстытæ бабар кодтой æбæрæг адæмæн. Уыдон дæр сайæгойтæ разындысты. Уголовон хъуыддаг сæ хъуыддагыл 4 азы цæуы. Кæрон ын нæй. Зæхх та уæдæй нырмæ ахст у.
Хъастгæнджытимæ фембæлд пъæлицæйы хицау, министры хæдивæг Дмитрий Гутыря. Дарддæр ныхас кодтой мидæгæй.
Пъæлицæйы хицау зæрдæ бавæрдта, ныртæккæ барадхъахъхъæнджытæ хъуыддаг æххæст кæй кæнынц. Сæ бон цы у, уый кæнынц.
Нæ редакцимæ фæстæдæр æрбарвыстой официалон хъусынгæнинаг дæр мидхъуыддæгты министрады пресс службæйæ. Загъд дзы куыд ис, афтæмæй ныртæккæ слестгæнæн мадзæлттæ цæуынц æххæстæй. Фæрсынц, хъыгдард чи баййæфта, уыдоны. Уголовон хъуыддаджы фæлгæты снысан кодтой хыгъдхæссæн æмæ къухфыст иртасæн экспертизæтæ.
Кæд зææх ауæй кодтой. Нæ зæхх. Уæд не хца та кæм ис? Уый йеддæмæ, ницæуыл дзурæм мах ныртæккæ. Цы нæм хауы, уый нын раттæнт. Æндæр ницы. Закъонмæ гæсгæ æнæмæнг, уæдæ куыд.
Мæнмæ ахæм хъуыды ис, алы къуыри дæр уæ цалдæрæй иу æрбацæуæд æмæ мæ кусæнуаты ныхас кæндзыстæм. Слестгæнæгимæ дæр. Дзурдзыстæм уыцы растæгмæ хъуыддаджы цы ивддзинæдтæ æрцыд, стæй ма цæуыл бакусын хъæуы, ууыл дæр. Афтæмæй уголовон хъуыддаг тагъд рæстæгмæ тæрхондонмæ бахæццæ уыдзæн.
_
Мы рядом в:
vk.com/irystontv
instagram.com/irystontv
Telegram: t.me/irystontv
youtube.com/irystontv
twitter.com/irystontv
