ՀՀ կառավարության որոշմամբ հաստատվել է նախադպրոցական կրթության պետական կրթական չափորոշիչը, որով սահմանվում են երեխաների ուսումնական բեռնվածության առավելագույն ծավալը, կրթական ծրագրերի բովանդակությունը, երեխաներին ներկայացվող որակական պահանջները, նախադպրոցական տարիքի երեխաների կրթության և զարգացման վերջնարդյունքի ապահովման հիմքերը: Սևանի Սերիկ Պետրոսյանի անվան թիվ 2 «Զարթոնք» մսուր-մանկապարտեզը հանրապետության 60 ՆՈՒՀ-երից մեկն է, որտեղ 2022-2023 ուսումնական տարում կիրականացվեն նախադպրոցական կրթական համալիր ծրագրերի փորձարկումներ, որոնք մշակվել են՝ ըստ նախադպրոցական նոր չափորոշչի: Մանկապարտեզում արդեն աշխատում են այդ ծրագրով, որը տալիս է մի շարք հնարավորություններ նախադպրոցական գործի նորովի կազմակերպման առումով: Դեռևս օգոստոս ամսին մանկապարտեզում «Կրթության զարգացման և նորարարությունների ազգային կենտրոն» /ԿԶՆԱԿ/ հիմնադրամի կողմից անցկացվել են վերապատրաստման դասընթացներ, որոնց մասնակցել են Սևանի, Ճամբարակի, Գավառի, Մարտունու, Վարդենիսի մի քանի ՆՈՒՀ-երի տնօրեններ, մեթոդիստներ, դաստիարակներ: Դասընթացի ընթացքում մասնակիցները հնարավորություն են ունեցել ծանոթանալու նախադպրոցական կրթության պետական կրթական չափորոշիչին, կրթական հիմնական ծրագրերի բովանդակությանը, ուսումնասիրել են օրենսդրական դաշտը, որը հնարավորություն է ընձեռում հաստատել բնականոն իրավահարաբերություններ սաների, նրանց օրինական ներկայացուցիչների հետ, որի առանցքում երեխաների իրավունքներն են, միաժամանակ պլանավորել են մանկավարժական գործունեությունը` սահմանելով կոնկրետ նպատակներ: Չափորոշիչի հիմքում նախադպրոցական տարիքի երեխաների կարողությունների վրա հիմնված մոտեցումն է: Համաձայն «Նախադպրոցական կրթության մասին» ՀՀ օրենքի` նախադպրոցական ուսումնական հաստատություններում աշխատող մասնագետները պետք է շարունակական վերապատրաստումներ անցնեն: Սևանի Սերիկ Պետրոսյանի անվան թիվ 2 «Զարթոնք» մսուր-մանկապարտեզ հաճախում է 145 երեխա, գործում է 6 խումբ:

свернуть