"J:морс" і Symbal.by зрабілі народны ролік пра тое, што нам блізка
У купальскія дні Symbal.by прадстаўляе прома-відэа на адмысловую летнюю версію песні "J:морс" & FolkRada "Блізка". У роліку на яе зняліся 150 чалавек з розных краін у адзенні з беларускай сімволікай.
Лепшая песня Беларусі па выніках нацыянальнай музычнай прэміі "Ліра" за 2016 год загучала ў аноўленай аранжыроўцы з даданнем яскравых купальскіх спеваў дзіцячага ансамбля FolkRada пад кіраўніцтвам Ірэны Катвіцкай.
Відэашэраг быў створаны Symbal.by на аснове фотаздымкаў у беларускім стылі, якія на заклік крамы дасылалі беларусы з розных куткоў Зямлі, візуальна распавядае пра "тое, што нам блізка".
– Нам штодзённа ва ўсіх сацыяльных сетках крамы дасылаюць мілыя фоткі ў беларускім стылі з нашымі і не толькі рэчамі, беларускім дэкорам, цікавымі элементамі, традыцыйнымі, гістарычнымі і нацыянальнымі сімваламі, – кажа кіраўнік Symbal.by Павел Белавус. – Для ўзняцця настрою бывае проста хапае ў інстаграме націснуць тэг #symbalby і тысячы прыгожых людзей глядзяць на цябе з фотаздымкаў, якія даказваюць, што Беларусь жыве і мае свае карані і традыцыі, якія нас усіх аб'ядноўваюць. Пра што і спявае Уладзімір Пугач у сваёй песні.
Арыгінальная версія песні "J:морс" "Блізка" выйшла ў снежні 2016. Гэта першы сінгл з новага альбома калектыву, які мае выйсці ўвосень 2017.
