UMPOYIKI MAWE?
Umpoye iki mawe mubyeyi wambyaye,
Ko ntaciye inyambo amabere,
Cyangwa ngo ndandure inzuzi zawe,
Yemwe habe no kumena igisabo,
Mawe ko ntananacanye injiji ikujishe,
None umpoye mubyeyi?
Umpoye iki ko untaye ukunguku,
Ukanziguruka nk'utaranyibarutse
Ukandekana intimba intimbagura
Ukandeba mbwenu nk'ukonguko
Kandi atariko narinarakubwiwe?,
Kuva kera iyo ubwo narinkivuka
Nasanze izina ryawe ari ubukumbe
Inkuru zawe ntaho zitavugwaga ku isi
Ko ari wowe mubyeyi wigirwaho ibyiza
Ko ari wowe urera imfubyi zikanyurwa zose,
Ndetse abatagira epfo na ruguru ukabacumbikira
None umpoye iki, ko undetse waranyibarutse?
Nasomye ibitabo byinshi bikuvugaho ubutwari
Numvishe amaradiyo kenshi agutaka ubushongore
Ndeba televiziyo nyinshi zivuga ko uri ikirangirire.,
Wavuzwe ibigwi kenshi bihuruza n'abanyamahanga
Ngo barebe udushya uhanga, twakugize igihangange,
Ngo barebe koko ubwo buhanga niba ari ubwagihanga.
None umpoye iki mubyeyi ko nziko ari wowe wambyaye?
Umpoye iki gituma ukamira abandi njye ayanjye ukayabikira?
Umpaye iki gituma uheka abandi njye umujishi ukawujishura?
Umpoye iki gituma ubavomera, ayanjye ukayamena ntanayanyoye?
Umpoye iki gituma unyaga izo utarangabira nk'aho nigometse?
Ni iki gituma unkura amata mu kanwa ukampaza intimba intimbagura?
Ca inkoni izamba ureke kunzambyazambya
Wibuke ko ndi uwawe umpaze nshire urosonzo
Weregufatanya n'abanzi ngo umbunze iyi imihanda
Ahubwo unkize ibi bihanda bimpanda mbashe kugoheke
Mbone aho mpera nkutaka ubutwari wahoranye,.
Nkurate ubusugire usagambe n'imahanga iyo
Uzaza agusebya nzamubwire isura igukwiye
Ariko shenge unkamire nerekurwara ubworo,
Abanzi ndi mutembanshyushyu, mutakwaraba,
Batambona ndi muberavu, mutakwabyavu.
Nkamira mawe nk'uko ukamira bariya bariya,
Maze nanjye ngushimire umukamo mwiza,
Nkamira shenge ntashengurwa n'iyi ntimba,
Nkamira mawe, nkamira mbyeyi mbyuke nkurata,
Nkamira windamiza amazi kandi winikije inyambo,
Nahato utazitwa ikigwari ugataramwa aho gutaramirwa.
Nkamira shenge umare ubu bworo bunteye ubwoba
Na hato ntapfana urusonzo kandi ugwije umutungo,
Nkamira nsinde iyi manga intereza impinga n'iyi misozi
Urampaze umutsima n'amata ntaramatana n'ikirago
Unyimane mawe, ungirire ikigongwe cya kibyeyi.
Maze mporane isheja n'imbare yawe aho ngenda hose
Nkamira umpaze nshire ubu bworo bungize mayibobo
Maze nkutaramire abasozi twataramiye mu Rukari
Nkuvuge uko nasanze mburizemoya migambi y'ababi
Nkamira nkuhunde ijabo n'isheja ibi bigukwiye.
Undinde abagome badashaka ko nasamura
Bashaka Ngo bambone nsama imisige mu bimoteri
Kandi arinjye moteri izakugeza kuri mbyinshi.
Cyo nkamira ndebe ko nanjye namira inshyushyu.
![](https://s2.save4k.ru/pic/oUoUuTDGKNY/maxresdefault.jpg)