Мұндай өкілеттілік ел тарихында тұңғыш рет берілді.

Еліміздің Сыртқы істер министрлігі берген мәлімет бойынша ертең БҰҰ Қауіпсіздік кеңесіне мүше елдердің тұрақты өкілдері бас қосып, төрағалықтың қаңтар айына арналған бағдарламасын қарастырады. Оның қорытындысы бойынша брифингтер болады. Жалпы осы айда жаппай қырып-жою қаруын таратпау, Ауғанстан мен Орталық Азиядағы өңірлік әріптестікті құру және Палестина мәселесі тақырыбында пікірталастар өтеді деп күтілуде. Сонымен қатар кеңес Қазақстан төрағалығының аясында Сирия, Ливия, Орталық пен Батыс Африка, Судан, Мали, Сомали және өзге де елдердегі жағдай бойынша ашық және жабық пікірталастар өткізеді. Онда төрағаның бірқатар қарары мен мәлімдемелерінің қабылдануы жоспарлануда. Осынау халықаралық ұйымға басшылық етудің маңыздылығын Елбасы өзінің жаңажылдық құттықтау сөзінде де ерекше атап өтті.

Нұрсұлтан Назарбаев, Қазақстан Республикасының Президенті:

– Казахстан обрел еще большую известность и уважение во всем мире. Наши усилия в Совете Безопасности ООН и в рамках Астанинского процесса содействовали укреплению мира и урегулированию сирийского кризиса.

Ұйымға төрағалық ету жоғары халықаралық мәртебе болып табылады. Себебі кеңес өз жиындарын өткізе отырып, мәжбүрлеу шараларына, экономикалық санкцияларға немесе ұжымдық әскери әрекеттерге қатысты шешімдер қабылдайды. Айта кетейік, БҰҰ Қауіпсіздік кеңесінің 5 тұрақты және 10 тұрақты емес мүшесі бар. Мемлекет басшысы Біріккен Ұлттар Ұйымы Қауіпсіздік кеңесінің жұмысына қатысады деп күтілуде.

свернуть