Khrist Dung Sun A Thoukia Ding A Ana Mualliam Masa It-le-ngaite Thei Zingna Suangphu Honna Vaiguan.
Ka pu uh Pu Nengzapum Munluo
Ka pa uh Elder M. Chinkhanthang
Ka nau Nh. Niangthiannem
10th January, 2020 | Ziltawpni
Upanu Nemneihoih' Inn, Singngat Vengnuam
A nai a gamla a hing kalsuan u-le-nau, pi-le-pu, ni-le-gang, khosung-tuisung leh hattuam tuamtuamte tung ah lungdam mama ung. Noute thumna ziah leh ngainatna ziah a tam vaiguan lawching ahi.
Tami vaiguan a inntehna hing la ka bualna uh hattuam Singngat Presbyterian Church, Presbyterian Church In India (Reformed) te tung ah lungdamna thu sangtah in ka gen uhi.
Pastor K. Muankim, Rev. G. Kam Cin Thang, Pastor K. Goukhansiam Guite te'n kilawmtah a ka pu, ka pa leh ka nau uh ang vuiliam sah ban ua kilawmtah a suangphuh ang honsah nalai uh khu thupi in lungdamhuai mama hi.
Rev. Dr. Khen P. Tombing, Chief Coordinator, PCI(R) in hamuan thugen leh innsungmite ding a thumsahna hing nei a hamuanhuai in lungmuanhuai mama hi. Lungdamhuai!
Pu Ginsuanhau, MLA 60 Singngat A/C leh a kai zatamte'n a hun nei sunsun ua ngainatah a hing uap vengveng uh khu thupi in koute ding in lungdamna thu genseng gual hilou hi.
Nh. Hatboi Taithul in itna liantah toh chialna bangbang a hing pomsah a zailai ngaitah ang sahpi khu lailungdamna sialpi bang in lian hi.
Tv. Tanlian Thawmte in zong a siamna zaza in kilawmtah in zaila hing awi a lungdamhuai vawt hi.
Lapawl loupitah leh siamtah a hing sa a, a kul-le-poimaw sep ding um zousia thanuamtah a hing seppi ka khanglaipi Singngat Presbyterian Youth Fellowship (SPYF) te tung ah lailungdam vangut hi.
Delhi Presbyterian Youth Fellowship (DPYF) a kipat hing uap vengveng ka lawmte mel ka mu in hamuanhuai in ka kipahna ka gensiam sih hi.
ZSP Don Bosco Branch 2014 - 16 Batch te'n ka lam et phalouh silpiah gil leh mantam ang piah ziah un ka lung a dam mama hi. "Dear mate, thank you so much for being with me thus far."
Ka nau uh Thiathian' senlawmte'n ama melmu ding in silpiah hoi leh mantamtah ang pia ua ka nau a itna uh thupi in gil ka sa mama uhi. Amaute tung ah lungdam ung.
Ka pu leh pa adia a pute uh Samte te leh kou naupangte pu, pu Khongsai te'n a tute uh ang itna uh vanpi bang in lian hi. Amaute ziah a tamtan tungthei ka hi bou uhi. Lungdamhuai mama hi.
Tuamabang in tute'n "Pute Lian E" chi'n pute itna silpiah ang pia ua, pahtawina kamteng ang gen un mipi zapi mai ah Saipi bang a lian hing sua uhi. Lailung ah a mang nawnsih ding.
Suang kilawmtah a hing gelsah, foundation etlawmtah a hing bawlsah ka Pu Suan leh a lawmte tung ah zong ka lungdam vangut uhi.
Pu Dongkhanlal Tonsing @Dosto, New Lamka Hebron Veng in neh-le-tah tuitah; vohsa, bawngsa leh ngasa Lamka khopi a kipat Singngat Vangkhua tan mi a sang a sim neh ding ang puah tung khu thupi ka sa uhi. Ang deisahna leh itna khu kou innkuante a ding mai hilou in Singngat khangthu adi'n chiamte kham ching ahi.
Nite, gangte, pute, pite, tanau-laina leh deisahtute'n tha-le-zung, sum-le-pai, a sang-a sang, a sing-a sing a na hing phungvuanate ziah ua tam vaiguan tatan tungthei ahi chi ka thei ua ka lungdamna thu uh ka sut seng ngeisih ding uhi.
A sing, a suang, a tui, a lei a hing pangte zousia tung ah zong ka lungdam mama uhi. Noute ziah a suang kiphut thei ahi.
Singngat Youth Club (SYC), Zou Youth Organization (ZYO) Singngat, Vengnuam te'n ngetna bangbang in PYF toh kithua a Social Work tha ittah a hing bawlpi ziah un ka kipah mama uhi.
A tawpna ah genkha ding a kilawm genkhaloute tengteng tung a zong lungdam mama ka hi uh hing chinalai vang. Lungdam vawt ung!
Thupina tengteng Mangpa'n tang hen!
Mihing vaiguan hilou Mangpa vaiguan ahi.
![](https://i.ytimg.com/vi/p4P-zUF56ko/maxresdefault.jpg)