Алматыда жыл басынан бері заң бұзушылық жасаған 4700-ден астам мопед жүргізушісі жауапқа тартылған. Ал жол көлік оқиғалары салдарынан 128 тұрғын жарақаттанып, 1 кісі көз жұмып отыр. Небәрі бір-ақ жыл ішінде мегаполистегі мопед жүргізушілерінің саны 3 есеге көбейген. Бұл өсім әсіресе, курьерлер мен жеткізу қызметкерлерінің есебінен болып отыр дейді әкімдік өкілдері. Алайда, апат саны артқанымен, жүгенсіз жүргізушілерді жөнге салу мүмкін болмай тұр. Себебі іс жүзінде не куәлігі, не мемлекеттік нөмірі жоқ көлік құралдарын полицейлер қамамайды. Сәйкесінше, заң бұзғандарын жүргізу құқығынан да айыра алмайды.
Бір қарағанда, қазір қала көшелерінде көліктен мопед көп пе дерсіз. Өйткені, тез тамақтану орындарынан бастап, бизнес орталықтарының да алдында дәл осы көлік құралы қаңтарылып тұрады. Әйтеуір, ертелі-кеш бірі тоқтап, бірі сол сәтте-ақ қозғалып жатқаны. Бірақ бәрі бірдей көлік ағылған көшеге шықпайды. Керісінше, жаяу жүргіншілер жолағына түсіп ап, басады-ай кеп. Көптің ашуын келтіретіні де сол. Ал көлік жүргізушілерімен арадағы айқастары жылдарға созылатын соғысқа ұласатын секілді. Себебі бірінің қатесін бірі кешірмейді. Бірін-бірі айыптайды.
Міне, осының кесірінен жол көлік оқиғалары да көп дейді жүргізушілер. Себебі не алдынан, не артынан аяқ асты шыға келген мопедті аңғармай қалады. Кінәлі болмаса да, тиісті норманың жоқтығынан салдарын да өздері тартуға мәжбүр. Ал мопед тізгіндеушілері бұл уәжбен келіспейді. Бірақ араларында кәмелет жасына толмаған, куәлігі жоқ, жол ережесін білмейтін жастар барлығын мойындайды.
Әрине, екі тараптың да сөзі орынды-ақ. Әрі пікірлері түйіскен тұс та жоқ емес. Яғни, олар мопедке кемі 18 жасқа толған және куәлігі бар адам ғана отырсын дейді. Сондай-ақ, мопедтердің кәдімгі машиналарға теңестірілгенін қалайды. Айтуларынша, бұл тәртіп ережені сақтауға сеп болмақ. Ал полицейлер соңғы бес ай ішінде 4700-ден астам жол көлік оқиғасы тіркелді деді. Бірақ мопед тізгіндеушілерді шектеуге не тәртіп бұзбауға қатысты қандай іс-шаралар қолға алынғанын айтпады.
САЛТАНАТ ӘЗІРБЕК, АЛМАТЫ ҚАЛАЛЫҚ ПОЛИЦИЯ ДЕПАРТАМЕНТІНІҢ РЕСМИ ӨКІЛІ:
– Мопедтердің қатысуымен 114 жол көлік оқиғасы орын алды. Нәтижесінде 128 адам жарақат алып, өкінішке орай бір адам көз жұмды. Сонымен қатар, атқарылған іс-шаралар барасында 4748 мопед жүргізушісі жол жүру ережесін өрескел бұзғаны үшін әкімшілік жауапкершілікке тартылды.
Әкімдік өкілдері, соңғы бір жыл ішінде мегаполистегі мопед жүргізушілерінің саны бірден 3 есеге көбейгенін айтты. Бұл көшедегі көлік қозғалысын қиындатып, апаттың артуына әкеп соғыпты.
Бізді әлеуметтік желіде оқыңыздар:
Информбюро 31 [ Ссылка ]
Informburo kz [ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
![](https://i.ytimg.com/vi/psr7Y85LcCQ/maxresdefault.jpg)