Фестивальдің негізгі шаралары мен көрсетілімдері 2018 жылғы 19 қазан күні өтті.
Таңертеңнен бастап Фестивальдің мәртебелі меймандары Әл-Фараби атындағы ҚазҰУ Бас музейін аралап, университеттің өткен тарихына көз жүгіртіп, келешегіне ой жүгіртіп шықты.
Ал, Жағдаяттық басқару орталығында мәртебелі меймандар соны технология қолданылған орталықтың жұмысымен таңдана танысып шықты. Өз әсерлерін жасыра алмаған меймандар ризашылықтарын білдіріп, арнамызға сұхбат берді.
19 қазан күні сағат 11:00-де Ректораттың мәжіліс залында ІІІ Түркі Дүниесі деректі фильмдер фестивалінің Қазақстандағы ресми ашылу салтанаты басталды.
Фестивальдің ашылу салтанатын Ректордың бірінші орынбасары Мұхамбетқали Бүркітбаев өзі бастап жүргізіп отырды.
Көшпелі фестивальдің Қазақстандық күнінің ашылуына Түркия Республикасының Алматыдағы Бас консулы Рыза Қаған Йылмаз және Түркі әлемі журналистер федерациясының президенті, Фестивальдің Ұйымдастыру комитетінің төрағасы Мендерес Демир, сондай-ақ, Ұйымдастыру алқасынының мүшелері мен осы фестивальға Қазақстан атынан қатысқан «Кәмила Әже» деректі фильмінің бас кейіпкері Кәмила Қасымова әже де қатысты.
Салтанатты шара одан әрі ҚазҰУ Телерадиокешені дайындаған «Әл-Фараби - Өркениет философы» атты фильмнің қазақша-түрікше нұсқасы көрсетілді.
Салтанатты шара Ұйымдастыру комитеті арнайы ұсынған «Түркі Ана» атты жинақталған деректі фильмдер топтамасымен жалғасты. Бұл фильм биылғы шараға қатысқан 8 түркі елінің 8 анасының жан тебірентерлік сан қилы тағдырын ашып көрсеткен.
Салтанатты рәсімде Фестивальдің Ұйымдастыру комитетінің төрағасы Мендерес Демир мырза Қазақстандық тарапқа ұйымдастыру шараларының жоғары деңгейінде болғаны үшін бірнеше азаматтарға дипломдар мен сертификаттар және арнайы мүсіншелерді табыс етті. Олардың қатарында: ҚазҰУ ректорының бірінші орынбасары Мұхамбетқали Бүркітбаев, Коммерциализация бойынша проректор Мехмет Арслан, Халықаралық байланыстар департаментінің директоры Айжан Смаилова, Имидждік саясат және қоғаммен байланыс департаментінің директоры Дәурен Дүйсебаев және ҚазҰУ Телерадиокешенінің директоры Дәурен Мұхамеджанов пен бүгінде жасы 94 аяқ басса да өзін еркін сезінетін Кәмила әже болды.
Өз кезегінде Мұхамбетқали Мырзабайұлы ҚазҰУ ректоры мен ұжымы атынан Кәмила әженің иығына камзол мен ақ жаулық жауып ілтипат көрсетті. Ал Кәмила әжеміз жиылған барша көрерменге ризашылығын білдіріп, ақ бастасын берді.
19 қазан күні түстен кейін кинокөрсетілімдер «Керемет» СҚКО кинозалында сағат 14:00-ден бастап кешкі 18:00 дейін жалғасты.
Көрсетілім алдында ҚазҰУ Телерадиокешенінің директоры Дәурен Мақсұтханұлы көрермендерді Фестивальдің мәртебелі қонақтарымен таныстырды. Олар: Мендерес Демир - Түркі әлемі журналистер федерациясының президенті, Фестивальдің Ұйымдастыру комитетінің төрағасы, Йылмаз Караджа – Түркия Журналистер федерациясының президенті, Мухаммад Талебпоуразад – халықаралық жобалар продюсері, Темел Шахин – Бурса қаласы әкімдігі мәдениет басқармасының өкілі, халықаралық дәрежедегі өнертанушы, ақын, Огуз Эге Сараоглу – халықаралық дәрежедегі деректі фильмдер маманы, фотограф және Аттила Гювен – Түркі іскерлік Кеңесі студенттік комиссиясының президенті.
Кинозалда «Кәмила Әже», «Sen Adam Mısın?», «1м2», «İsterdim Belgeseli», «Dişe Diş Söze Söz», «Ибн Сина» деректі фильмдерінің көрсетілімі болды.
Сонымен «Сегіз ел, сегіз шаһар, бір фестиваль» ұранымен өтіп жатқан биылғы фестиваль Түркия, Әзірбайжан, Қазақстан, Қырғызстан, Өзбекстан, Македония, Түркиялық Кипр республикасы және Татарстаннан, жалпы алғанда 23 мемлекеттен 140 астам жұмыстарды қабылдап, 12 фильм ақтық сынға өтіп, оның ішінен үздіктер таңдап алынған. Фестиваль ережесіне биылғы жылы көпшіліктің сұрауы бойынша өзгертулер мен толықтырулар еніп, кәсіпқойлар мен студенттер жеке-жеке сынға түсті. Ал келесі жылғы фестивальдің тақырыбы «Түркі Ата», яғни Түркі елдеріндегі ер адамдардың портреті жайлы деректі фильмдер сынға түсетін болады.
Фестивальдің үшінші күнінде ІІІ Түркі Дүниесі деректі фильмдер фестивалінің мәртебелі меймандары Әл-Фараби атындағы ҚазҰУ Спорткешенінде ұлттық ат спортымыздың бірі – көкпарды тамашалады.
«Рухани Жаңғыру» бағдарламасы аясында ұлттық спортымызды дамыту мақсатында Әл-Фараби атындағы Қазақ Ұлттық университеті мен Жастар Көкпар Лигасының ұйымдастыруымен «JKL PROFI 3x3» форматында кәсіби көкпар командалары арасында тартысты көкпар ойыны өтті.
Ат үстінде атой салған барша түркі жұртына ортақ ат спортының үздігі көкпар ойыны арқылы қазақ жастарының жігері мықты, рухы биік екендігіне көздері жеткен меймандар көтеріңкі көңіл күймен көрші Қырғыз елінде фестивальді ұйымдастыру үшін жолға шықты.
#Turkbelgeselfimfest #AlFarabiUniversity #TRCKazNU
Ещё видео!