Ўтган кўрсатувда Исломий ва демократик давлат ўртасидаги ўхшашлик ҳамда айирмаларни кўриб чиқдик. Ана шу кўрсатувдан кейин сиз асл Исломий давлат қандай бўлган ва бундан кейин ҳам қандай бўлиши кераклиги ҳақида асосий тушунчаларга эга бўлдингиз, деб ўйлайман. Мана шундай тушунчалар Исломий давлат қуриш ҳамда исломий давлатда яшашни орзу қиладиган мусулмон ватандошларимизда ҳам пайдо бўлди, деган фикрдаман.

Бундай ниятдаги одамлар нафақат бизнинг Ўзбекистонимизда, балки аҳолисининг аксарият қисми мусулмонлардан иборат барча мамлакатларда ҳам бор. Албатта, ўзини мусулмон деб ҳисоблайдиган ҳар қандай киши ўша расуллуллоҳ алайҳи вассаллам ва у зоти алайҳиссаломдан кейинги тўрт ҳалифа давридаги каби адолатли давлатда яшашни орзу қилади.

Мусулмонларнинг асл Исломий давлат қуриш орзуси кимгадир, айниқса, даҳрий, дунёвий қарашдаги одамларга ёқмаслиги мумкин. Лекин ёқмаса ҳам, ёқса ҳам, мусулмонларнинг бундай орзулари борлиги ҳақиқат. Ҳақиқатлардан эса юз ўгириб бўлмайди.

Менимча, “Ислом давлати қураман”, деган ниятдаги одамларни таъқиб ва қатағон қилгандан кўра, улар билан суҳбатлашиш керак, деб ҳисоблайман. Масалан, шундай суҳбатлар давомида бундай орзудаги ватандошларимизга, айниқса, ёшларимизга: “Исломий давлатни қандай шаклда тасаввур қиласиз?”, “Сиз орзу қилган Исломий давлатда, масалан, парламент ёки адвокатура институти бўладими? Ёки бўлмаса, ҳудди Толибон қурган давлатдаги каби, қонунларни парламентсиз қабул қилиб, одамларни адвокатсиз суд қилаверасизларми?” деган конкрет саволларни бериш керак.

Аминман-ки, Исломий давлат қуриш орзусидаги аксарият одам мана шундай саволларга аниқ жавоб бера олмайди. Жавоб бера оладиганлари ҳам: “Биз қурмоқчи бўлган давлатда ўғрининг қўли кесилади, зинокор аёллар эса тошбўрон қилинади?”, деб жавоб беришади. Афсус-ки, Исломий давлат қуриш орзусидаги аксарият мусулмонларнинг ўз орзулари ҳақидаги тасаввурлари шундан нарига ўтмайди.

Яъни, уларда Исломий давлат қуриш орзуси бор холос. Лекин бу давлатнинг икир-чикирлари ҳақида аниқ-тиниқ маълумотлари ҳам, билимлари ҳам йўқ. Шунга қарамасдан, улар ўз орзуларига етишиш йўлидаги тўсиқ ва нуқсонларни ўзларидан эмас, яъни ўзларининг билимсизлигидан эмас, балки бошқалардан қидиришади. Масалан, яҳудийлардан, Исроилдан, Америкадан, Ғарб давлатларидан ва маҳаллий тоғут режимлардан излашади.

Мусулмонларга Муҳаммад саллоллоҳу алайҳи вассаллам ва ундан кейинги тўрт ҳалифа давридаги каби асл ва адолатли Ислом давлатини қуришга ким кўпроқ тўсқинлик қилмоқда: мусулмонларнинг ўзларими ёки уларнинг душманларими?

“Факт ва Фикр”нинг бугунги кўрсатувида асл Исломий давлат қуришга тўсқинлик қилаётган бош омилларни кўриб чиқамиз.

свернуть