յսօրվա դատական նիստում «Սասնա ծռեր» խմբի անդամ Արայիկ Խանդոյանին դուր չեկավ նիստերի քարտուղարի խոսքը։ Նա ըստ կարգի զեկուցում էր, որ նիստին ներկայացվել են գործով ամբաստանյալները: «Ամբաստանյալը մենք չենք, մեզ մեր անուններով դիմեք, մենք ազատամարտիկներ ենք»,- ասաց Արայիկ Խանդոյանը:
Երբ դատավոր Մեսրոպ Մակյանը նրան կրկին դիմեց «ամբաստանյալ Խանդոյան»-ով, վերջինս բարկացավ. «Դու ես ամբաստանյալը»: Դատարանը նրա նկատմամբ սանկցիա է կիրառեց նախազգուշացման տեսքով, Արայիկ Խանդոյանը զարմացավ. «Ո՞վ ա հայտարարել, ի՞նչ դատարան, մենք ստեղ դատարան չենք տեսնում»,- ավելացրեց Արայիկ Խանդոյանը:
Այսօրվա դատական նիստը կարճ տեւեց։ Դատարանն ստացել էր փաստաբաններ Արայիկ Պապիկյանի, Տիգրան Եգորյանի, Դավիթ Գյուրջյանի, ինչպես նաեւ Արա Ղարագյոզյանի կողմից ուղարկված դիմումները, ըստ որոնց՝ այսօրվա դատական նիստին չեն կարող ներկայանալ, քանի որ մասնակցում են տարբեր գործերով դատական նիստերի:
