şeir: Esmira Mehiqızı
səs: Xəzər Süleymanlı
piano: Vüsal Namazlı

eləəəə..
çox şeylər keçmir.
qalır, qalır yerində.
yağışlar gözlərində,
vidalar əllərində.

heç bilmirsən bu quş da,
axşam-sabah dənlənib
nə gəzir tellərində.
baxırsan güzgülərə..
görürsən uşaqlığın gizlənib üzündəki
sarımtıl çillərində..

və bir qız gülümsəyir üzünün ayazından,
ömrünün payızından,
gözlərində üşüyən xatirənin yazından..

əlini uzadırsan..
əlin o qıza çatmır,
əlin o yaza çatmır.
elə görürsən, eləəə
ömründə nəsə çatmır

amma hər şey yerində olduğu kimi durur,
divar,
günəş,
ay,
dəniz.
çığırırsan,
-ay dəniz, ay dəniz heyyy, ay dəniz!
sahilində yüyürən bir çilli qız varıydı,
o qızı görməmisən.
nə vaxtsa da bir qayıq çevrilib ağzı üstə,
o qız batıb sularda,
bəlkə də bilməmisən..
bəlkə hay-haray salıb,
sən də eşitməmisən.

ehh..
hardan xəbər alsan,
hər şey susur necə də..
dəniz də belə susur..nə sirri var, dərində.
elə heyrət edirsən,
hər şey yerindədirsə,
niyə,
niyə,
bəs niyə..
o qız yoxdu yerində.

eləəəə..
çox şeylər keçmir
qalır, qaldığı kimi.
ağzı üstə çevrilən
ömrün qayığı kimi.

#xezersuleymanli #xəzərsüleymanlı

свернуть