«Даму» кәсіпкерлікті дамыту қорының бағдарламалары бойынша елімізде жас кәсіпкерлердің 2 мыңға жуық жобасы қаржыландырылған.

Бұл туралы «Almaty Startup City» форумында қордың басқарушы директоры Ғабит Лесбеков мәлімдеді.

Бүгін Алматыда өткен жастар форумында инновациялық жобалардың көрмесі де ұйымдастырылды.

«Almaty Startup City» жастар форумы биыл екінші рет ұйымдастырылып отыр. Қонақтардың назарына 20-дан астам инновациялық жоба ұсынылды. Олар негізінен ақпараттық технология, көлік инфрақұрылымы және басқа саланы қамтиды. Іңкәр Сәдуақасова құрбыларымен бірге жапырақтан отын шығаруды жоспарлап отыр.

Іңкәр Сәдуақасова, студент

-Жапырақ – тегін энергия көзі. Және де экономикалық жағынан тиімді. Әзірге жобасын дайындап отырмыз. Соны бізге жүзеге асыруға инвесторлар қажет.

Бұл жиынның мақсаты да инновациялық жоба авторлары мен инвесторлар арасында байланыс орнату. «Даму» қорының басқарушы директоры қордың жастарға арналған қаржылық бағдарламалары туралы баяндап берді.

Ғабит Лесбеков, «Даму» КДҚ басқарушы директоры-басқарма мүшесі

-Бүгінгі күнде 954 жас кәсіпкер жалпы 15, 9 миллиард теңге шамасында несиеге, жеңілдетілген несиелерге қол жеткізді. Екінші бағыт ол мемлекет жағынан осы банктердің қаражаттарын жас кәсіпкерлерге беруін ынталандыру бағдарламалары. Олар кепілдендіру, екіншісі – субсидия құралы.

Қор 146 адамға кепілдеме берген. Ал 777 жас кәсіпкер «Даму» қоры тарапынан жалпы құны 152 миллиард теңге субсидия алған.

Сонымен қатар жаңа бизнес ашуды және студент жастардың кәсіпкерлік бастамаларын қолдау жобалары бар. Қор жанындағы кәсіпкерлерге қызмет көрсету орталығынан кеңес алған 34 мыңнан астам жастың алдыңғы легі бүгінде өз кәсібін ашқан.

Авторлары: Ұлан Нарынбек, Әбен Нарынбаев

свернуть