Mehman Hüseynova azadlıq tələb edənlərin bir hissəsi darvazanın çölündə, digəri içəridə qalıb. Aksiyaçılar yanvarın 4-də Nizami Rayon Məhkəməsində mühakimə olunublar. Onlar İnzibati Xətalar Məcəlləsinin 513.2 maddəsi, “Sərbəst toplaşmaq azadlığı haqqında qanuna zidd təşkil edilən mitinq, nümayiş və ya piketdə iştirak etməkdə təqsirləndiriliblər.
“Bir ölkənin ki, rəhbəri diktator ola, oradan nə gözləmək olar ki?! Yaxşı heç nəyə ümid etmirəm. Yuxarı nə göstəriş versə, onu da edəcəklər. Məhkəmə kimdir ki?!”- aksiya iştirakçısı Mətanət Mahmırzayeva deyir.
Gecəni Nizami Rayonu 24-cü polis bölməsində keçirənlərdən Səxavət Nəbiyev 20, Nurlan Qəhrəmanlı və Elimxan Ağayev 21, Əfqan Sadıqov 22 sutka inzibati həbs cəzası alıb.
Fərid Abdinov , Mətanət Mahmırzayeva, Pərvin Abışova və Fatimə Mövlamlı isə 300-400 manat arasında cərimə edilərək, sərbəst buraxılıblar.
“Öz istədikləri kimi qərar çıxardılar. Şahid qismində 2 polis çıxış elədi. Heç birini tanımıram. Polis İdarəsinin pilləkanında məni döyüb, içəri saldıqlarında heç o polisləri görməmişdim. Bir-birlərinə zidd ifadələr verdilər. Hakim də bunu qeyd elədi. Buna baxmayaraq, yenə də öz bildikləri qərarı çıxartdılar”, - jurnalist Pərvin Abışova deyir.
Bir qrup ictimai fəal yanvarın 3-də paytaxtın “Neftçilər” metrostansiyasının çıxış hissəsində bloger Mehman Hüseynovun azad edilməsi tələbi ilə aksiya keçirib. 20 dəqiqədən çox keçən aksiyanı dağıdan polis 15 nəfərədək aktivist və jurnalisti Nizami Rayonu 24-cü Polis Bölməsinə aparıb. Axşam saat 11 radələrində onların bir qismi sərbəst buraxılıb. Digərləri isə inzibati qaydada məsuliyyətə cəlb olunub. Saxlananlara bu müddət ərzində ailələri ilə danışmağa imkan verilməyib.
“Mənim əynimdəki gödəkçəmi cırdılar. Üstümə 2 dəfə təcili yardım çağırıldı. Amma polis rəisi imkan vermədi ki, Təcili yardım mənə müdaxilə etsin. Mən orada ölə də bilərdim. Başım piləkənin tininə dəymişdi. Durmadan qaytarırdım”, - jurnalist Pərvin Abışova deyir.
“Bizim kimi adamlar həbs olunmaq, məhkəmə qarşısına çıxarmaq da problem deyil. Problem ondadır ki, bizi necə aparırlar? Ən pis küçə söyüşləri ilə, təhqirlə, vurmaqla... Post Patrul maşınında polislər minmək istəmədiyinə görə Səxavət Nəbiyevi vururdu. Sonra biri qadınları təhqir elədi. Eyni təhqiri qaytardım ona. Mənə şillə vurdu. Dedim, busunuz da. Cinayətkarsız”, -aksiya iştirakçısı Fatimə Mövlamlı deyir.
Mehman Hüseynov 2017-ci ilin martında Nəsimi Rayon Polis İdarəsinin rəisinin qaldırdığı böhtan iddiası əsasında 2 il azadlıqdan məhrum edilib. Azadlığa çıxmasına 2 ay qalmışdı ki, ona qarşı yeni ittiham irəli sürülüb. Rəsmi məlumata görə, Mehman Hüseynov ədliyyə leytenantı Əli Abdalova xəsarət yetirib, otaqdakı əşyaları qırıb və üzərində saxlanılması qadağan olan 461 manat pul aşkarlanıb. Mehman Hüseynova ona qarşı açılan yeni cinayət işinə etiraz əlaməti olaraq müddətsiz aclıq elan edib.
Mehmanın müdafiəsinə qalxan aksiyaçılardan cərimə cəzası alanlar bu məbləği ödəməyib apelyasiya şikayəti verəcəklərini deyirlər. Həbs edilənlər isə cəzalarını yerində çəkmək üçün 11 saylı cəzaçəkmə müəssisəsinə göndəriliblər.
Kanala abunə ol - [ Ссылка ]
WebSite: [ Ссылка ]
Facebook: [ Ссылка ]
Twitter: [ Ссылка ]
Google+ [ Ссылка ]
İnstagram: [ Ссылка ]
__
Xəbərdən çox xəbər var. Çəkin göndərin yayımlayaq - whatsapp : +49 176 16263646
![](https://i.ytimg.com/vi/sa6-9S0wq2A/maxresdefault.jpg)