SƏNDƏN NİGARANAM
(Sözləri Baba Vəziroğlunundur)
Ömrüm boyu gözümdə kam,
Bu həsrəti daşıyıram.
Mən birtəhər yaşayıram,
Səndən nigaranam...
Yandı qəlbim, soldu keçdi,
Bir də sevmək daha gecdi,
Mənə olan oldu, keçdi,
Səndən nigaranam...
Mən sahilsiz bir gecəyəm,
Heç bilmirəm kiməm, nəyəm,
Nə vecinə, mən necəyəm,
Səndən nigaranam...
Gəlib hərdən düşər yada,
O günlər bir nağılsa da,
Bütün dünya dağılsa da,
Səndən nigaranam...
Ömür ötür aram-aram,
Heç bilmirsən yoxam, varam,
Mənsə səni soruşaram,
Səndən nigaranam,
Təkcə səndən nigaranam!..
