Талдықорғанда 3 жасар бүлдіршінді "ұрып өлтірді" деген күдікпен оны қарап, баққан күтушісі ұсталды. 23 жастағы бойжеткен бастапқыда қамауға алынғанымен, кейінірек қалалық сот оны "үй қамағына" босатқан. Баланың анасы күтушіні мүлдем танымайтын болып шыққан. Себебі оны интернеттегі хабарландырудан тауыпты. Соған қарамастан, екі бірдей шиеттей баласын 3 айдан бері осы бейтаныс адамның күтіміне берген. Бүлдіршіндер онда тек күндіз ғана емес, түнде де қонып жүріпті. Анасының айтуынша, ол 1 және 3 жастағы балаларын күтушінің тәрбиесіне шарасыз күйге түскендіктен қалдырған.
Бұл аяусыз соққыдан қайтыс болған 3 жасар ұл баланың суреті. Анасының айтуынша, бүлдіршіннің үсті-басы көкала қойдай көгеріп, денесінің сау тамтығы қалмаған. Ал қайғылы жағдай өткен дүйсенбіде болыпты.
МАДИНА ТАУКЕНОВА, Қайтыс болған баланың анасы:
– Мен как раз осы жерде жұмыс жасап жүремін. Маған нянька звондайды, "бала ауырып жатыр, температурасы көтеріліп жатыр" деп. Содан мен баланың карточкасын алып үйге барамын. Үйге барсам, баланың бет аузынан түк жоқ. Денесінен түк жоқ, шошыдым мен. Реанимацияға кіргізіп, бала қайтыс болды деді. Мен сол жерде талып қалдым, есімді әрең жидым.
Мадинаның айтуынша, баласы ауруханаға жеткізілген соң, көп ұзамай көз жұмған. Дәрігерлер бүлдіршіннің миына қан кеткен деген анықтама беріпті. Ал екі кішкентай бала соңғы үш айдан бері дәл осы көпқабатты үйдегі пәтерлердің бірінде тұрған. Себебі, анасы жақында ажырасып, панасыз қалған екен. Айтуынша, өзі қонақ үйдің бірінде тұрып, еден-ыдысын жуған. Ал бар тапқанын балаларының қараушысына беріп келіпті. Бірақ, соңғы уақытта күтушінің қызмет ақысын төлей алмаған. Қазір бүлдіршін қайтыс болған үйдің маңында қыбыр еткен жан жоқ. Күдікті тарап болған жәйтті айтудан үзілді-кесілді бас тартты.
Жантүршігерлік қылмысқа не түрткі болғаны белгісіз. Қазір бала күтушінің үстінен Қылмыстық кодекстің 106-шы, яғни "абайсызда жәбірленушінің өліміне әкеп соққан денсаулыққа қасақана ауыр зиян келтіру" бабы бойынша тергеу жүріп жатыр. Ал, соттың күдіктіні не себепті "үй қамағына" жібергені әзірге белгісіз.
ЖАННА НУПБАЕВА, Жетісу облыстық Полиция департаменті баспасөз қызметінің өкілі:
– Баланың өліміне қатысы бар деген күдікпен бұрын қарап баққан 23 жастағы жергілікті тұрғын ұсталды. Күдіктіні уақытша ұстау изоляторына қамаққа алды. Бірақ кейінірек қалалық сот күдіктіге үй қамағы санкциясын берді.
Күдіктінің қылмысы дәлелденсе 8 жылдан 12 жылға дейін бас бостандығынан айырылуы мүмкін. Ал үйінің жоқтығынан балаларын айлап бейтаныс адамдардың күтіміне тапсырған Мадианың 1 жасар ұлы балалар үйіне орналастырылды.




Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31

свернуть