Şeir: Musa Yaqub - Öyrətmə özünə, öyrətmə məni
Səsləndirmə: Musa Yaqub
Musiqi: Aqşin Əlizadə - Hüzn valsı
Biraddımla'ya YouTubeda abunə olmaq: [ Ссылка ]
Biraddımla'nın sosial şəbəkə ünvanları:
Instagram: [ Ссылка ]
Facebook: [ Ссылка ]
TikTok: [ Ссылка ]
Telegram: [ Ссылка ]
E-poçt: biraddimlayol@gmail.com
MUSA YAQUB - ÖYRƏTMƏ ÖZÜNƏ, ÖYRƏTMƏ MƏNİ
Taleyin qisməti rast saldı bizi.
Yolumuz hardasa qırılacaqsa,
İtirəcəyiksə bir-birimizi,
Xatirəm yadında qalmayacaqsa.
Bu əllər mənimki olmayacaqsa,
Bu tellər mənimki olmayacaqsa
Sən allah, özünə öyrətmə məni,
Hicran qoxusuyla göynətmə məni.
Əlimi saçına öyrətmə belə,
Gözümü gözünə öyrətmə belə;
Üzümü üzünə öyrətmə belə.
Mən bir az baharlı budaq kimiyəm,
Bir az da sadəlövh uşaq kimiyəm.
Bala anasına qovuşan kimi,
Leylək yuvasına qovuşan kimi,
Arı gül-çiçəyə uyuşan kimi,
Eh, mən də adama tez yovuşanam,
Sevgi atəşində tez alışanam,
Amma ki, sönməyim çox çətin olur –
Sevgidən dönməyim çox çətin olur,
Öyrətmə özünə, öyrətmə məni.
Bəlkə gözləmirdik bu xoş görüşü,
Yaman qəribədir dünyanın işi;
Heç vaxt yollarında dayanmadığın,
Heç həndəvərində dolanmadığın
Gəlib birdən sənə nə şirin olur!
Ömrünün içində ömür doğulur.
Bu şirinim acı olacaq isə,
Bir qismət çiçəyim solacaq isə,
Öyrətmə özünə, öyrətmə məni.
Könlümdə yerin var, qopmaz yerindən,
Bir əkiz ləçəyi, haça budağı
Ayırmaq olmursa biri-birindən,
Məni də ayırmaq çətindir axı.
Öyrətmə özünə, öyrətmə məni;
Yox buna təqatim, yox buna tabım
Əlimi əlindən üzmək əzabım,
Sonra bu əzaba dözmək əzabım...
Yoxsa da, könlümün sınıqları var,
Hicranın köz basmış yanıqları var -
Mənim dərdlərimin ayaqları var -
Harda olsa gəlib tapacaq məni,
Yaxıb yandıracaq bu ocaq məni.
Gəl məni özünə öyrətmə belə,
Əlimi əlinə öyrətmə belə,
Gözümü gözünə öyrətmə belə...
1984
Musa Yaqub:
“...“ Öyrətmə özünə öyrətmə məni “ şeiri düzdür bəlkə də bir konkret kiməsə yazılıbsa da elə deyil, çoxunadır. Bu şeir tək sevgi şeiri deyil. Dost-dosta öyrəşir, göz-gözə öyrəşir, məsələn insan lap torpağına, elinə, bir ağaca öyrəşir. Bu öyrəşmənin hamısı ümumi yəqin bir gözəlin üzündə təcəssüm olunub, daha odlu, daha atəşli üzə çıxıb. Bu taleh şeirləridir. Mənim üçün bunlar ən asan yazılan şeirlərdir. Çünki onu mənim qədər duyan, hiss eləyən heç kəs ola bilməz...“
#musayaqub #oyretmeozuneoyretmemeni #öyrətməözünəöyrətməməni #şeir #poeziya #şair #musiqi #incəsənət #aqşinelizade #hüznvalsı #biraddimla #biraddimlayol
